Summer: குளியல் முதல் கொஞ்சூண்டு ஐஸ்க்ரீம் வரை... குழந்தைகளுக்கு கூல் டிப்ஸ்!

வெயிலில் குழந்தைகள் விளையாடும்போது வியர்வை அதிமாக வெளியேறி, நீரிழப்பு ஏற்படும். அதைத் தவிர்க்க, அவர்களை அதிகம் தண்ணீர் குடிக்கவைக்க வேண்டும். 3-5 வயதுவரையுள்ள குழந்தைகள் வழக்கமாகக் குடிப்பதைவிட ஒரு லிட்டர் அதிகமாகவும், 6-8 வயதுவரையுள்ளவர்கள் ஒன்றரை லிட்டர் அதிகமாகவும், 9-13 வயதுவரையுள்ள குழந்தைகள் 2 லிட்டர் அதிகமாகவும் தண்ணீர் குடிக்க வேண்டும்.

குழந்தைகளின் பாதங்களைப் பாதுகாக்க, ஷூ அணியத் தேவையில்லாத இடங்களில் செருப்புகளையே அணிந்துசெல்ல வையுங்கள். ஷூ அணிந்தே ஆகவேண்டியிருந்தால் காட்டன் சாக்ஸ் மட்டுமே அணிய வேண்டும். ஒரு முறை அணிந்த சாக்ஸை துவைக்காமல் மீண்டும் பயன்படுத்தக் கூடாது. இறுக்கமான ஷூ, காலணிகளால் விரல் இடுக்குகளில் வியர்த்து, தொற்றுகள் ஏற்பட வாய்ப்பிருக்கிறது.

கோடைக்காலத்தில் டைபாய்டு, காலரா, மஞ்சள்காமாலை போன்ற நோய்கள் குழந்தைகளுக்கு வராமலிருக்க, வீட்டில் தயாரிக்கப்படும் சுகாதாரமான உணவுகளை மட்டுமே சாப்பிடவைக்க வேண்டும். தெருவில், உணவகங்களில் விற்கப்படும் பண்டங்கள் சுகாதாரமாக இருப்பதற்கான வாய்ப்பு குறைவு என்பதால், அவற்றைத் தவிர்த்துவிடுவது நல்லது.

தூய்மையான பருத்தி உடைகளை மட்டுமே அணிவியுங்கள். இறுக்கமில்லாத தளர்வான உடைகள் ஏற்றவை. வெளிர் நிற உடைகள் வெப்பதை உள்ளே இழுக்காமல் பிரதிபலிக்கும் என்பதால், அவற்றைத் தேர்ந்தெடுக்கலாம். அடர் நிற உடைகளைத் தவிர்க்கலாம். வெயிலில் வெளியே செல்லும்போது பயன்படுத்தும் குடையும் கறுப்பு நிறத்தில் இல்லாமல், வெள்ளை, நீலம் போன்ற சற்று வெளிர் நிறத்தில் இருப்பது நல்லது.

பாக்கெட், டின்களில் அடைக்கப்பட்டு, குளிர்விக்கப்பட்டு விற்கப்படும் பானங்களை குழந்தைகளுக்கு வாங்கிக் கொடுக்கக் கூடாது. அவற்றுக்கு பதிலாக, இளநீர், மோர், ஃப்ரெஷ் ஜூஸ் கொடுக்கலாம். கோடைக்காலத்தில் குழந்தைகளுக்கு நீராகாரம் கொடுக்கலாம். ஆரோக்கியமான பானம் இது.

குழந்தைகளால் ஐஸ்க்ரீம் ஆசையை அடக்க முடியாது. எனவே, நன்கு சுகாதாரமான முறையில் ஐஸ்க்ரீம் தயாரித்து, பாதுகாத்து, விற்பனை செய்யும் கடைகளில் குறைந்த அளவில் வாங்கி குழந்தைகளுக்குக் கொடுக்கலாம். தினமும் அல்லது அடிக்கடி ஐஸ்க்ரீம் வாங்கித் தருவதைத் தவிர்க்கவும்.

காலை 11 மணியிலிருந்து மாலை 3 மணிவரை, சூரியக் கதிர்வீச்சு அதிகமாக இருக்கும். அந்த நேரத்தில் குழந்தைகள் வெயிலில் விளையாடினால் அதிகளவில் வியர்வை சுரந்து நீரிழப்பு (Dehydration) ஏற்படும். எனவே, அந்த நேரத்தில் அவர்களை வெளியே விளையாட விடாமல் வீட்டுக்குள் ஆடும் விளையாட்டுகளில் ஈடுபடுத்தலாம்.

கூந்தல் அதிகமிருக்கும் பெண் குழந்தைகளுக்கு. அவர்கள் விளையாடிவிட்டு வந்ததும், ஃபேன் காற்றில் அவர்களின் கூந்தலை நன்கு உலரவிட வேண்டும். இல்லையென்றால், பொடுகு, நீர்க்கோத்தல் உள்ளிட்டவை ஏற்படலாம்.

தினமும் இரண்டு முறை குழந்தைகளைக் குளிக்கவைக்க வேண்டும். இரண்டு முறையும் தலைக்குக் குளிக்கவைக்கலாம். இயலாதவர்கள், காலையில் மட்டுமாவது குழந்தைகளை அவசியம் தலைக்குக் குளிக்க வைக்க வேண்டும்.

கோடைக்காலத்தில் குழந்தைகளுக்கு என பேக் தயார் செய்யலாம். அதில், தொப்பி, கண்ணாடி, குடை, ஹேண்ட் வாஷ், கைக்குட்டை அல்லது சிறு துண்டு, தண்ணீர் பாட்டில், ஓ.ஆர்.எஸ் கரைசல் பவுடர், இளநீர், நீர் மோர், வெள்ளரி, பதநீர் போன்றவற்றை வைத்திருக்கலாம்.