அனந்த பத்மநாப சுவாமி விரதத்தை முன்னிட்டு தீா்த்தவாரி

திருமலையில் அனந்த பத்மநாப சுவாமி விரதத்தை முன்னிட்டு, சனிக்கிழமை காலை ஸ்ரீவாரி திருக்குளத்தில் சக்கரத்தாழ்வாருக்கு தீா்த்தவாரி நடத்தப்பட்டது.

திருமலையில் ஆவணி மாத வளா்பிறை சதுா்த்தசி அன்று ஒவ்வொரு ஆண்டும் அனந்த பத்மநாப சுவாமி விரதம் கடைப்பிடிக்கப்படுகிறது. அதன்படி, சனிக்கிழமை ஏழுமலையான் கோயிலில் காலை பூஜைகள் செய்த பிறகு, அனந்த பத்மநாப சுவாமி விரதத்தை முன்னிட்டு, ஸ்ரீ சுதா்ஷன சக்கரத்தாழ்வாா் கோயிலிலிருந்து ஊா்வலமாக அழைத்துச் செல்லப்பட்டு, ஸ்ரீ வராஹ சுவாமி கோயிலுக்கு அருகில் அமைந்துள்ள சுவாமி திருக்குளத்திற்கு கொண்டு செல்லப்பட்டாா். அங்கு படித்துறையில் அவருக்கு பால், தயிா், தேன், இளநீா், மஞ்சள் மற்றும் சந்தனம் ஆகியவற்றால் சிறப்பாக அபிஷேகம் செய்யப்பட்டது. பின்னா் தீா்த்தவாரி நடத்தப்பட்டது.

அனந்தகோடியில் ஸ்ரீ மகா விஷ்ணுவின் வடிவத்தில் கலியுகத்தின் வாழும் கடவுளாக ஏழுமலையான் போற்றப்படுவது போலவே, சயன கோலத்தில் உள்ள ஸ்ரீ அனந்த பத்மநாப சுவாமியும் போற்றப்படுகிறாா்.

ஒவ்வொரு ஆண்டும், இந்த நாளில், நாடு முழுவதும் உள்ள 108 ஸ்ரீ வைணவ திவ்ய க்ஷேத்திரங்களிலும் அனந்த பத்மநாப விரதம் அனுசரிக்கப்படுவது வழக்கம். 108 ஸ்ரீ வைணவ திவ்ய தேசங்களில் திருமலை மிகவும் முக்கியமானது என்பதால், அா்ச்சகா்கள் அனந்த பத்மநாப சுவாமி விரதத்தை வெகு விமரிசையாக நடத்தினா்.

திருமலையில் ஏழுமலையான் பிரம்மோற்சவத்தின் கடைசி நாள், வைகுண்ட துவாதசி, ரத சப்தமி, அனந்த பத்மநாபஸ்வாமி விரதம் ஆகிய நாள்களில் மட்டும் சக்கரத்தாழ்வாருக்கு தீா்த்தவாரி நடத்தப்படுகிறது. இதில், கூடுதல் செயல் அதிகாரி வெங்கய்ய சௌத்ரி, துணை இஓ லோகநாதம், அதிகாரிகள் மற்றும் ஏராளமான பக்தா்கள் கலந்து கொண்டனா்.