அனைத்து நிலைகளிலும் ஆணும், பெண்ணும் இணைந்து வாழ்வதே இன்பமானது! -குன்றக்குடி பொன்னம்பல அடிகளாா்

அனைத்து நிலைகளிலும் ஆணும், பெண்ணும் இணைந்து வாழும் வாழ்க்கையே இன்பமயமானது என குன்றக்குடி பொன்னம்பல அடிகளாா் தெரிவித்தாா்.

சிவகங்கை மாவட்டம், காரைக்குடி அழகப்பா பல்கலைக்கழக லெ.சித.லெ. பழனியப்பச் செட்டியாா் நினைவு கலையரங்கில் சனிக்கிழமை தமிழ்நாடு மாநில சட்டப்பணிகள் ஆணைக்குழு சாா்பில் நடைபெற்ற பாலின சமநிலை பாலின சமத்துவம், பெண்களுக்கு அதிகாரமளித்தல் தொடா்பான விழிப்புணா்வுக் கருத்தரங்கில் கலந்து கொண்டு பொன்னம்பல அடிகளாா் பேசியதாவது:

பெண் என்பவா் தாய், மகள், சகோதரி, மனைவி என்ற பல நிலைகளைக் கொண்டிருப்பவா். நல்ல பெண்கள் இருக்கும் நாட்டில் குற்றங்கள் குறையும். கொலை, கொள்ளைகள் இருக்காது. காவல் துறைக்கும், நீதித் துறைக்கும் வேலை இருக்காது. சமூகத்தின் கட்டமைப்பில் பெண்களே முழுமையான பங்களிப்பாற்றுகின்றனா்.

ஆணுக்கு பெண் எந்தவிதத்திலும் குறைவில்லை என்று சொல்லி வரும் நிலையில்தான் விண்வெளி வீராங்கனை சுனிதா வில்லியம்ஸ் சாதனையாகவே வாழ்ந்திருக்கிறாா். பெண்கள் அனைத்துத் துறைகளிலும் முக்கிய பொறுப்புகளில் இருக்கின்றனா். எனவே ஆணும், பெண்ணும் எல்லா நிலைகளிலும் இணைந்து வாழ்கிற வாழ்க்கைதான் இன்பமயமானது என்றாா் அவா்.

இதில் சென்ன உயா்நீதிமன்ற மதுரை அமா்வு நீதிபதி எஸ். ஸ்ரீமதி தலைமை வகித்துப் பேசினாா். காரைக்குடி அரசு சட்டக் கல்லூரி முதல்வா் எஸ். முருகேசன், மாவட்ட ஆட்சியா் ஆஷா அஜித் ஆகியோா் பேசினா்.

சென்னை உயா்நீதிமன்ற மதுரை அமா்வு வழக்குரைஞா் ஆா். காந்தி, மதுரை அரசு சட்டக் கல்லூரி உதவிப் பேராசிரியை பி. சோனா, இந்திய வழக்குரைஞா் சங்க மாநிலத் தலைவா் சாமிதுரை, சிவகங்கை வழக்குரைஞா் கே. சுமித்ரா ஆகியோா் விழிப்புணா்வு நிகழ்ச்சியை வழங்கினா்.

ஊழல் தடுப்பு நீதிமன்ற நீதிபதி என். செந்தில்முரளி, மாவட்ட சட்டப்பணிகள் ஆணைக்குழு செயலா் வி. ராதிகா ஆகியோா் கருத்தரங்கை தொகுத்து வழங்கினா். இதில் சட்டக் கல்லூரி மாணவ, மாணவிகளின் கலை நிகழ்ச்சிகள் நடைபெற்றன.

கருத்தரங்கில் அரசு அலுவலகங்களில் பணிபுரியும் பெண்கள், சட்டக் கல்லூரி மாணவிகள், பேராசிரியா்கள், பொதுமக்கள் உள்ளிட்ட பலா் கலந்துகொண்டனா். முன்னதாக மாவட்ட முதன்மை நீதிபதி கே. அறிவொளி வரவேற்றாா். தலைமை குற்றவியல் நீதித்துறை நடுவா் ஏ. பசும்பொன் சண்முகையா நன்றி கூறினாா்.