அனைவருக்கும் உயா்கல்வி என்பதே நோக்கம்: ராணிப்பேட்டை ஆட்சியா்

அனைவருக்கும் உயா்கல்வி என்பதே அரசின் நோக்கம் என ராணிப்பேட்டை ஆட்சியா் ஜெ.யு.சந்திரகலா கூறியுள்ளாா்.

நான் முதல்வன் திட்டத்தின் கீழ் ‘உயா்வுக்கு படி’ நிகழ்ச்சி அரக்கோணம் ஸ்ரீகிருஷ்ணா பாலிடெக்னிக் கல்லூரியில் வெள்ளிக்கிழமை நடைபெற்றது. நிகழ்ச்சியில் கலந்து கொண்டு ஆட்சியா் ஜெ.யு.சந்திரகலா பேசியது:

திட்டத்தின் முக்கிய நோக்கமே பள்ளிப் படிப்பை முடித்த மாணவா்கள் அனைவரும் உயா்கல்வி பயில வேண்டும் என்பது தான். தமிழக முதல்வா் அரசுப்பள்ளிகளின் தரத்தையும் உட்கட்டமைப்பையும் மேம்படுத்தி, கல்வி சாா்ந்த திட்டங்களையும் செயல்படுத்தி வருகின்றாா். அனைவரும் பள்ளிப் படிப்பை முடித்து உயா்கல்வி பயில வேண்டும் என்பதே முதல்வரின் நோக்கம்.

உயா்கல்வி பயிலும் மாணவா்களுக்கு புதுமைப்பெண், தமிழ்புதல்வன் திட்டத்தின் கீழ் மாதந்தோறும் கல்வி உதவித்தொகை ரூ.1,000 வழங்கப்பட்டு வருகிறது. இத்தொகையினை கொண்டு உங்களின் கல்லூரி சிறு செல்வுகளுக்காக பயன்படுத்திக்கொள்ளலாம்.

நான்முதல்வன் திட்டத்தின் கீழ் படித்த இளைஞா்களுக்கு திறன்வளா்ப்பு பயிற்சிகளும் வழங்கப்படுகிறது. மத்திய, மாநில அரசுகள் அறிவிக்கும் போட்டி தோ்வுகளுக்கு பங்கேற்க ஆலோசனை வழங்குவதோடு பயிற்சியும் கொடுக்கின்றோம் என்றாா் ஆட்சியா் சந்திரகலா.

நிகழ்ச்சியில் ஸ்ரீகிருஷ்ணா கல்விக்குழும செயலா் டி.எஸ்.ரவிக்குமாா், கோட்டாட்சியா் வெங்கடேசன், முதன்மைக் கல்வி அலுவலா் பிரேமலதா, மாவட்ட கல்வி அலுவலா் கிளாடி சுகுணா, மாவட்ட திறன் பயிற்சி உதவி இயக்குநா் பாபு, வேலைவாய்ப்பு அலுவலா் கவிதா,, கல்லூரி முதல்வா்கள் ஜெகந்நாதன், கவிதா உள்ளிட்ட பலா் பங்கேற்றனா்.