அரசு வேலை வாங்கித் தருவதாக ரூ.27 லட்சம் மோசடி: பழனி தம்பதியா் மீது வழக்கு

அரசு வேலை வாங்கித் தருவதாகதக் கூறி, 4 பேரிடம் ரூ.27 லட்சம் மோசடி செய்த பழனி தம்பதியா் மீது மாவட்டக் குற்றப் பிரிவு போலீஸாா் வழக்குப் பதிவு செய்தனா்.

திண்டுக்கல் மாவட்டம், பழனியை அடுத்த சின்னக்கலையம்புத்தூா் விஜயபுரம் பகுதியைச் சோ்ந்தவா் ஆ.பாலசுப்பிரமணியன். அதே பகுதியைச் சோ்ந்த ஆ.காா்த்திகேயன், இவரது மனைவி பிரேமலதா ஆகியோா் அரசு வேலை வாங்கித் தருவதாகக் கூறி பணம் மோசடி செய்ததாக மாவட்டக் காவல் கண்காணிப்பாளா் அலுவலகத்தில் பாலசுப்பிரமணியன் புகாா் அளித்தாா். அதன்பேரில், மாவட்டக் குற்றப் பிரிவு போலீஸாா் விசாரிக்க, காவல் காண்காணிப்பாளா் அ.பிரதீப் பரிந்துரைத்தாா்.

போலீஸாா் நடத்திய விசாரணையில், காா்த்திகேயன் தம்பதியா் பாலசுப்பிரமணியனுக்கு சுமாா் 20 ஆண்டுகள் பழக்கம் இருந்தது. காா்த்திகேயன் மின் வாரியத்தில் பணிபுரிவதாகவும், ஈரோடு பகுதியைச் சோ்ந்த மோகன், தலைமைச் செயலகத்தில் பணிபுரியும் ஜெயக்குமாா் ஆகியோா் மூலமாக இந்தப் பணி வாய்ப்பு கிடைத்ததாகவும் பிரேமலதா தெரிவித்தாா். இதை நம்பிய பாலசுப்பிரமணியன் கடந்த இரு ஆண்டுகளுக்கு முன்பு பல தவணைகளில் ரூ.6.50 லட்சத்தையும், அலுவலகத் தேவைக்காக ரூ.50 ஆயிரம் என மொத்தம் ரூ.7 லட்சத்தை காா்த்திகேயனிடம் கொடுத்தாா். ஆனால், அரசு வேலை வாங்கிக் கொடுக்காததால் ஏமாற்றம் அடைந்த பாலசுப்பிரமணியன், பல்வேறு இடங்களில் விசாரித்தபோது காா்த்திகேயன் தம்பதியா் மேலும் பலரிடம் மோசடி செய்தது தெரியவந்தது.

பழனியைச் சோ்ந்த சரவணமுத்துவின் மனைவி சித்ராவுக்கு பள்ளிக் கல்வித் துறையில் வேலை வாங்கித் தருவதாக ரூ.9 லட்சம், பழனியைச் சோ்ந்த முத்துக்குமாருக்கு பொதுப் பணித் துறையில் இளநிலை உதவியாளா் பணி வாங்கித் தருவதாக ரூ.6.50 லட்சம், பழனியைச் சோ்ந்த ரமேஷுக்கு அரசு வேலை வாங்கித் தருவதாக ரூ.4.50 லட்சம் என மொத்தம் ரூ.27 லட்சம் மோசடி செய்தனா்.

இதையடுத்து, காா்த்திகேயன், இவரது மனைவி பிரேமலதா ஆகியோா் மீது மாவட்டக் குற்றப் பிரிவு போலீஸாா் வழக்குப் பதிவு செய்தனா்.