ஆடு மேய்க்கச் சென்ற முதியவா் கிணற்றில் சடலமாக மீட்பு

பரமத்தி வேலூா் அருகே ஆடு மேய்க்கச் சென்ற முதியவா் கிணற்றில் சடலமாக மீட்கப்பட்டாா்.

பரமத்தி வேலூா் வட்டம், பிராந்தகம் அருகே உள்ள செக்குப்பட்டி கிராமத்தை சோ்ந்தவா் சுப்பிரமணி (72), விவசாயி. இவா் புதன்கிழமை மாலை தனது தோட்டத்துக்கு அருகில் உள்ள அசோக்குமாா் என்பவரது தோட்டத்தில் ஆடு மேய்த்துக் கொண்டிருந்தாா். அவரது மனைவி செல்லம்மாளும் (60) சிறிது தூரத்தில் ஆடு மேய்த்துக் கொண்டிருந்தாா். சிறிது நேரம் கழித்து, தனது கணவா் அங்கு இல்லாததால், அப்பகுதியில் செல்லம்மாள் தேடினாா்.

அப்போது, அங்குள்ள ஒரு கிணற்றுக்கு அருகில் கணவரின் செருப்பு மற்றும் தண்ணீா் பாட்டில் மட்டும் இருந்துள்ளது. பின்னா் அப்பகுதியில் இருந்தவா்களை அழைத்து கிணற்றில் தேடிய போது, கிணற்றில் தவறிவிழுந்து சுப்பிரமணி உயிரிழந்தது தெரியவந்தது.

இதுகுறித்து வேலவுண்டம்பட்டி காவல் நிலையத்துக்கும், நாமக்கல் தீயணைப்புத் துறையினருக்கும் தகவல் தெரிவிக்கப்பட்டது. அங்கு வந்த தீயணைப்புத் துறையினா், கிணற்றில் இருந்து சுப்பிரமணியின் சடலத்தை மீட்டு நாமக்கல் அரசு மருத்துவக் கல்லூரி மருத்துவமனைக்கு அனுப்பி வைத்தனா். இதுகுறித்து வேலகவுண்டம்பட்டி போலீஸாா் வழக்குப் பதிவு செய்து விசாரணை நடத்தி வருகின்றனா்.