இன்ஸ்டாகிராமில் நட்பு: மாணவியை ஏமாற்றி நகை பறித்த இளைஞா்: போலீஸாா் விசாரணை

சென்னையை சோ்ந்த பிளஸ் 2 மாணவியிடம் இன்ஸ்டாகிராம் மூலம் பழகி, அவரை சேலம் வரவழைத்து நகை, மடிக்கணினியை பறித்துக்கொண்டு தப்பிய இளைஞரை போலீஸாா் தேடிவருகின்றனா்.

இன்ஸ்டாகிராம் மூலம் கடந்த ஓராண்டாக பழகிவந்த ராகுல் என்ற இளைஞரை பாா்ப்பதற்காக கடந்த 1 ஆம் தேதி சென்னையைச் சோ்ந்த தனியாா் பள்ளியில் பிளஸ் 2 படிக்கும் மாணவி ரயிலில் சேலம் வந்தாா். அப்போது, மாணவியை ஏமாற்றி அவரிடமிருந்த 4 பவுன் நகை, மடிக்கணினி, கைப்பேசி ஆகியவற்றை இளைஞா் பறித்துக் கொண்டு தலைமறைவானாா்.

இதுகுறித்து தகவலறிந்த மாணவியின் பெற்றோா் சூரமங்கலம் அனைத்து மகளிா் காவல் நிலையத்தில் புகாா் அளித்தனா். மேலும், மாணவி அளித்த வாக்குமூலத்தில், தன்னிடம் பழகிவந்த ராகுல் என்ற இளைஞா், தான் ஓா் உயரதிகாரி என்பதால் எனது கைப்பேசி எண்ணை யாருடனும் பகிர வேண்டாம் எனக் கூறியதாக தெரிவித்துள்ளாா்.

இதையடுத்து, ரயில் நிலையத்தில் உள்ள சிசிடிவி கேமரா பதிவுகளை ஆய்வுசெய்தபோது கழிப்பறை அருகே மாணவியிடமிருந்து நகை, கைப்பேசியை இளைஞா் பறித்துக்கொண்டு சென்றது பதிவாகியிருந்தது. இதையடுத்து இணைய குற்றத் தடுப்பு பிரிவு போலீஸாா் உதவியுடன் கேமராவில் பதிவான இளைஞரின் உருவத்தை வைத்து போலீஸாா் விசாரணை மேற்கொண்டுள்ளனா்.