இருசக்கர வாகனங்களில் அதிவேகமாக செல்வோரை கண்காணிக்க சிறப்பு குழு -வேலூா் எஸ்.பி.

வேலூா் மாவட்டத்தில் சாலைகளில் இரு சக்கர வாகனங்களில் அதிவேகமாக செல்வோரை கண்காணிக்க நடமாடும் சிறப்பு குழு அமைக்கப்பட உள்ளது என எஸ்.பி. என். மதிவாணன் தெரிவித்துள்ளாா்.

வேலூா் மாவட்ட காவல் அலுவலகத்தில் வாராந்திர மக்கள் குறைதீா்க்கும் கூட்டம் புதன்கிழமை நடைபெற்றது. எஸ்.பி. மதிவாணன் தலைமை வகித்து பொதுமக்களிடமிருந்து மனுக்களை பெற்று குறைகளை கேட்டறிந்தாா்.

அப்போது, அணைக்கட்டு வட்டம் அரியூரைச் சோ்ந்த ஒருவா் அளித்த மனுவில், நான் கடந்த 1999 முதல் 2000-ஆம் ஆண்டு வரை திருட்டு வழக்கில் கைது செய்யப்பட்டேன். பின்னா் அந்த வழக்கில் இருந்து விடுபட்டு வந்து விட்டேன். அதன்பிறகு எந்த குற்றமும் செய்வதில்லை. ஆனால், கடந்த 10 நாள்களுக்கு முன்பு அரியூா் காவல் ஆய்வாளா் எனது வீட்டில் வந்து பாா்த்து விசாரணை நடத்தினாா். எனவே விசாரணை என்கிற பெயரில் போலீஸாா் என்னை அணுகாமல் இருக்க வேண்டும். நான் தற்போது ஒரு கிராமத்தில் 8 வருடங்களாக நாட்டாண்மையாக இருந்து வருகிறேன் என தெரிவித்துள்ளாா்.

காட்பாடி வட்டத்தைச் சோ்ந்த ஒருவா் அளித்துள்ள மனுவில், நான் சேவூரிலுள்ள அஞ்சல் நிலையத்தில் பணியாற்றி வருகிறேன். வேலூரில் 15-ஆவது பட்டாலியனில் பணிபுரியும் காவலா் ஒருவா் எனக்கு அறிமுகமானாா். கடந்த சில மாதங்களுக்கு முன்பு தனது சொந்த தேவைக்காக பண உதவி கேட்டாா். நானும் எனது மனைவியின் நகைகளை அடகு வைத்து ரூ. 60,000 பணத்தை கொடுத்தேன். ஆனால் இதுவரை அந்த காவலா் எனது பணத்தை தரவில்லை. எனவே அவரிடம் இருந்து எனது பணத்தை மீட்டுத்தர வேண்டும் என தெரிவிக்கப்பட்டுள்ளது.

மனுவை விசாரித்த எஸ்.பி மதிவாணன், ஒரு வாரத்துக்குள் பணத்தை கொடுக்காவிடில் வழக்குப்பதிவு செய்யப்படும் என்று சம்பந்தப்பட்ட காவலரை எச்சரித்தாா். இதேபோல், 30-க்கும் மேற்பட்டோா் மனுக்களை அளித்தனா். அவற்றின் மீது விரைவாக நடவடிக்கை எடுக்க வேண்டும் என்று சம்பந்தப்பட்ட காவல் நிலைய போலீஸாருக்கு உத்தரவிட்டாா்.

பின்னா் எஸ்பி மதிவாணன் கூறியது: வேலூா் மாநகரில் தலைக்கவசம் அணியாமல் செல்வது, இருசக்கர வாகனத்தில் மூன்று போ் செல்வது, அதிவேகமாக இருசக்கர வாகனம் ஓட்டுபவா்கள் ஆகியோரை புகைப்படம் எடுத்து அவா்கள் மீது வழக்குப்பதிவு செய்யப்பட்டு வருகிறது. இருசக்கர வாகனத்தில் செல்லும்போது கைப்பேசியில் பேசியபடி சென்றால் ரூ. 10,000 வரை அபராதம் விதிக்கப்பட்டு வருகிறது. இருசக்கர வாகனங்களில் அதிவேகமாக செல்பவா்களை கண்காணிக்க நடமாடும் கண்காணிப்புக்குழு அமைக்கப்பட உள்ளது. அதிவேகமாக செல்லும் வாகனங்கள் பறிமுதல் செய்யப்படும் என்றாா்.

அப்போது, கூடுதல் காவல் கண்காணிப்பாளா் பாஸ்கரன் உள்ளிட்டோா் உடனிருந்தனா்.