இரும்புச்சத்து குறைபாடு முதல் ஆண்மைக் குறைபாடு வரை... சப்போர்ட் செய்யும் சப்போட்டா!

சுவை மிகுந்த, கலோரி நிறைந்த சப்போட்டா ஆரோக்கியத்துக்கும் சப்போர்ட்டாக இருக்கிறது. உடலுக்குச் சத்தை அளிப்பதோடு, சருமத்துக்கும் பலன் அளிக்கிறது என்கிறார் பெரம்பலூரைச் சேர்ந்த அரசு சித்த மருத்துவர் பாலசுப்ரமணியன்.

• சப்போட்டாவில், வைட்டமின்கள் பி6, சி, இ, ரிபோஃப்ளேவின், நியாசின், மாங்கனீஸ், பொட்டாசியம் மற்றும் நார்ச்சத்துகள் நிறைவாக உள்ளன. இது உடலுக்கு குளிர்ச்சியையும் பலத்தையும் தரும். இரும்புச்சத்து இருப்பதால் கர்ப்பிணிகள், ரத்தசோகை உள்ளவர்கள் இந்தப் பழத்தைச் சாப்பிடலாம்.

• ஆண்மைக் குறைபாடு உள்ளவர்கள் சாப்பிட்டுவந்தால், குறைபாடு நீங்கும். நரம்புத் தளர்ச்சி உள்ளவர்கள் சாப்பிடலாம்.

• கார்போஹைட்ரேட், சர்க்கரை, புரதச்சத்து இருப்பதால், சர்க்கரை நோயாளிகள் மற்றும் உயர் ரத்த அழுத்தம் உள்ளவர்கள், இந்தப் பழத்தை உண்ணக் கூடாது.

• களைப்பைப் போக்கி, உடலுக்குப் புத்துணர்ச்சி தரக்கூடியது. குழந்தைகள் மற்றும் விளையாட்டு வீரர்கள் அதிகம் எடுத்துக்கொள்ளலாம்.

• சப்போட்டா, முழுவதுமாகப் பழுக்காத நிலையில், செங்காயாகவும் சமைத்துச் சாப்பிடலாம். உடல் வலுப்பெற உதவும்.

• சப்போட்டா பழம், ரத்த ஓட்டத்தை சீராக்கி, கொழுப்பை நீக்கக்கூடியது. வாய்ப்புண், வயிற்றுப் புண், மலச்சிக்கல் தீரும்.

• சப்போட்டா பழத்துடன், எலுமிச்சைச் சாறு கலந்து சாப்பிட, சளித் தொல்லை நீங்கும்.

• பித்த வாந்தி, மயக்கம் இருந்தால், சப்போட்டா பழத்துடன் சீரகம் சேர்த்துச் சாப்பிடலாம். சட்டென சரியாகும்.

• சப்போட்டா பழத்துடன், வெள்ளரி விதை, பயத்தமாவு கலந்து, குளிப்பதற்கு முன்பு பூசிவர, முகம் பிரகாசமாக ஜொலிக்கும்.