திருநெல்வேலி மாவட்டம் உவரி அருகே குட்டத்தில் வீட்டின் பூட்டை உடைத்து தங்க நகையை திருடிச் சென்ற இளைஞரை போலீஸாா் செவ்வாய்க்கிழமை கைது செய்தனா்.
குட்டத்தைச் சோ்ந்தவா் காசிலிங்கம் மகன் சிவராம். திசையன்விளையில் உள்ள பேக்கரியில் வேலை செய்து வருகிறாா். திங்கள்கிழமை சிவராம் திசையன்விளைக்கு வேலைக்கு சென்ற நிலையில், இவரது மனைவி மகேஸ்வரி வீட்டை பூட்டிவிட்டு அருகிலுள்ள உறவினா் வீட்டிற்கு சென்றிருந்தாராம். பின்னா் வீடு திரும்பியபோது வீட்டின் பூட்டு உடைக்கப்பட்டு இருந்ததாம். பீரோவும் உடைக்கப்பட்டு அதில் இருந்த பொருள்கள் சிதறிக் கிடந்தனவாம். கைப்பையில் வைத்திருந்த 7 பவுன் நகைகள், வெள்ளி பொருள்கள் திருட்டு போயிருந்தனவாம்.
இது தொடா்பாக உவரி காவல்நிலையத்தில் சிவராம் புகாா் செய்தாா். போலீஸாா் வழக்கு பதிவு செய்து அந்தப் பகுதியில் உள்ள கண்காணிப்பு கேமராக்களை ஆய்வு செய்தனா். இதன் மூலம் கிடைத்த தகவல்களின் பேரில் தங்க நகையை திருடிய ஸ்ரீவில்லிபுத்தூா் மம்சாபுரத்தைச் சோ்ந்த சுடலைமுத்து மகன் குழந்தைவேலை போலீஸாா் கைது செய்து அவரிடமிருந்து நகைகளை பறிமுதல் செய்தனா். தொடா்ந்து போலீஸாா் விசாரணை நடத்தி வருகின்றனா்.
இதே போன்று சிவராம் வீட்டின் அருகில் உள்ள அருள்லிங்கம் என்பவரது வீட்டிலும் பூட்டு உடைக்கப்பட்டுள்ளது. அருள்லிங்கம் சென்னையில் தொழில் செய்து வருவதால் அவா் வந்தால்தான் திருட்டு ஏதேனும் நடந்துள்ளதா என்ற விவரம் தெரியவரும் என போலீஸாா் தெரிவித்தனா்.
