`ஔரங்கசீப் கல்லறையை அகற்ற வலியுறுத்தும் விஷ்வ இந்து பரிஷத்...' - அரசியல் தலைவர்கள் விமர்சனம்..!

மகாராஷ்டிராவில் அரசியலில் சமீப காலமாக மொகலாய மன்னன் ஔரங்கசீப் கல்லறை பேசும் பொருளாக மாறி இருக்கிறது. அதுவும் சமீபத்தில் சத்ரபதி சிவாஜி மகாராஜாவின் மகன் சத்ரபதி சாம்பாஜியின் வாழ்க்கை வரலாற்றை மையமாக வைத்து எடுக்கப்பட்ட சாவா என்ற இந்தி திரைப்படம் வெளியான பிறகு ஔரங்கசீப் கல்லறையை இடிக்கவேண்டும் என்ற கோரிக்கை தீவிரம் அடைந்திருக்கிறது. இக்கோரிக்கையை வலியுறுத்தி இன்று இந்து அமைப்புகளான விஷ்வ இந்து பரிஷத் மற்றும் பஜ்ரங் தளம் அமைப்புகள் இன்று மாநிலம் தழுவிய போராட்டத்திற்கு அழைப்பு விடுத்துள்ளன. இதையடுத்து கல்லறை இருக்கும் சாம்பாஜி நகர் மாவட்டத்தில் பாதுகாப்பு பலப்படுத்தப்பட்டுள்ளது.

இது குறித்து மகாராஷ்டிரா மற்றும் கோவா விஷ்வ இந்து பரிஷத் செயலாளர் கோவிந்த்ஜி செனடே கூறுகையில்,''ஔரங்கசீப் கல்லறைக்கு எதிரான எங்களது இயக்கம் படிப்படியாக மேற்கொள்ளப்படும். பொதுமக்களிடம் விழிப்புணர்வை ஏற்படுத்துதல், மனு கொடுத்தல், போராட்டம் நடத்துதல், கொடும்பாவி எரித்தல், பொதுக்கூட்டம், விழிப்புணர்வு முகாம் என்று படிப்படியாக இருக்கும். இறுதியாகத்தான் ஔரங்கசீப் கல்லறையை முற்றுகையிடுவோம்'' என்று தெரிவித்தார்.

இன்று இந்து அமைப்புகள் ஔரங்கசீப் கல்லறையை அகற்ற கோரி மாநில அரசிடம் மனு கொடுக்க இருக்கின்றனர். அதில் ஔரங்கசீப் கல்லறையை அகற்ற சட்டப்பூர்வ நடவடிக்கை எடுக்கவில்லையெனில் போராட்டம் மற்றும் கரசேவகர்களை ஒன்று திரட்டி முற்றுகையிடுவது போன்ற காரியங்களில் ஈடுபடுவோம் என்று கோரிக்கை மனுவில் குறிப்பிட இருப்பதாக இந்து அமைப்புகள் தெரிவித்துள்ளன.

இது குறித்து மகாராஷ்டிரா துணை முதல்வர் ஏக்நாத் ஷிண்டே கூறுகையில்,''மராத்தியர்களின் உணர்வுகளுக்கு மதிப்பளிக்கிறேன். சாம்பாஜி மகாராஜாவை ஔரங்கசீப் சித்ரவதை செய்தார். எனவே ஔரங்கசீப்பை யாரும் ஆதரிக்க மாட்டார்கள். அவர் மகாராஷ்டிராவின் எதிரி. துரோகி. அப்படி இருக்கும்போது ஔரங்கசீப் கல்லறை ஏன் மகாராஷ்டிராவில் இருக்கவேண்டும்'' என்று தெரிவித்தார்.

இது குறித்து சரத்பவார் மகள் சுப்ரியா சுலே கூறுகையில்,'' இது ஒன்றும் அரசியல் கட்சி கிடையாது. வரலாற்று நிகழ்வு. இதில் அரசியல்வாதிகள் தலையிடக்கூடாது. இதனை அது தொடர்பான வல்லுனர்களிடம் விட்டுவிடவேண்டும். இது வரலாற்று தொடர்பானது என்பதால் அது பற்றி வரலாற்று நிபுணர்கள்தான் பேசவேண்டும்''என்றார்.

காங்கிரஸ் எம்.எல்.ஏ.விஜய் இது குறித்து கூறுகையில், ''வி.எச்.பி மற்றும் பஜ்ரங் தளத்திற்கு இப்போது செய்வதற்கு எதுவும் இல்லை. மகாராஷ்டிர மக்கள் நிம்மதியாக வாழ்வதை அவர்கள் விரும்பவில்லை. அவர்கள் மாநிலத்தின் வளர்ச்சி வேகத்தை குறைக்க விரும்புகிறார்கள். ஔரங்கசீப் மகாராஷ்டிராவில் 27 ஆண்டுகள் இருந்த போது மகாராஷ்டிராவிற்கு எதுவும் செய்யவில்லை. இப்போது அவரது கல்லறையை அகற்றிவிட்டால் அவர்களுக்கு என்ன கிடைத்துவிடப்போகிறது" என்று அவர் கேள்வி எழுப்பினார்.

மாநில காங்கிரஸ் செய்தித்தொடர்பாளர் அதுல் லோண்டேயும் மாநிலத்தில் பதட்டமான நிலை இருப்பதாகவும், சட்டம் ஒழுங்கு மோசமடைந்து இருப்பதாகவும் குறிப்பிட்டுள்ளார். ஏற்கெனவே சத்ரபதி சிவாஜியின் சந்ததியில் வந்தவராக கருதப்படும் பா.ஜ.க எம்.பி உதயன் ராஜே போஸ்லே, சாம்பாஜி நகர் மாவட்டத்தில் இருக்கும் ஔரங்கசீப் கல்லறையை அகற்றவேண்டும் என்று கோரிக்கை விடுத்திருந்தார்.

அதேசமயம் `ஔரங்கசீப் கல்லறை மகாராஷ்டிராவில் இருக்கவேண்டும். ஔரங்கசீப் மகாராஷ்டிராவில் புதைக்கப்பட்டுள்ளான் என்பதை மக்கள் தெரிந்து கொள்ளவேண்டும்' என்று உத்தவ் தாக்கரே கட்சியைச் சேர்ந்த அர்விந்த் சாவந்த் எம்.பி தெரிவித்துள்ளார். மேலும் இது தனது தனிப்பட்ட கருத்து என்றும், கட்சியின் கருத்து கிடையாது என்றும் தெரிவித்துள்ளார்.

அதோடு ஔரங்கசீப்பை புகழ்ந்து பேசியதற்காக சமாஜ்வாடி கட்சி எம்.எல்.ஏ.அபு ஆஸ்மி சட்டமன்றத்தில் இருந்து சஸ்பெண்ட் செய்யப்பட்டுள்ளார். மாநிலம் முழுவதும் இன்று இந்து அமைப்புகள் போராட்டம் நடத்தி வருகின்றனர்.

வேட்டை நாய்கள் - Gangs of தூத்துக்குடி -இப்போது விகடன் ப்ளேயில்..!

Link : Part 01 : https://tinyurl.com/Vettai-Naigal-Part-01 |

Part 02: https://tinyurl.com/Vettai-Naigal-Part-02 |

80களில் தூத்துக்குடியை மிரள வைத்த டான்களின் கதை வேட்டை நாய்கள் - Gangs of தூத்துக்குடி இப்போது Audio formatல் உங்கள் Vikatan Playல். இப்பவே Vikatan APPஐ Download செய்யுங்கள் Play Iconஐ Click பண்ணி வேட்டை நாய்கள் கேளுங்க | #Vikatan #VikatanPlay #AudioBooks