பெட்ரோல், டீசலை ஜிஎஸ்டி வரம்புக்குள் கொண்டுவர வேண்டும்: கே. பாலகிருஷ்ணன்
கஞ்சா மற்றும் போதை ஸ்டாம்புகள் விற்பனை செய்த 3 இளைஞா்களுக்கு தலா 5 ஆண்டுகள் சிறைத் தண்டனை விதித்து, கோவை போதைப் பொருள் கடத்தல் தடுப்பு நீதிமன்றம் செவ்வாய்க்கிழமை தீா்ப்பளித்தது.
கோவை வெள்ளக்கிணறு பகுதியில் கஞ்சா மற்றும் போதைப் பொருள்கள் விற்பகப்படுவதாக போலீஸாருக்கு தகவல் கிடைத்தது. இதையடுத்து, கோவை போதைப் பொருள் நுண்ணறிவுப் பிரிவு போலீஸாா் கடந்த 2020 பிப்ரவரி 20-ஆம் தேதி அப்பகுதியில் ரோந்து சென்றனா்.
அப்போது, அங்கு சந்தேகத்துக்கு இடமான வகையில் நின்று கொண்டிருந்த மூன்று இளைஞா்களைப் பிடித்து விசாரித்தனா்.
அவா்கள் அந்தப் பகுதியைச் சோ்ந்த முகமது தபரீஸ் (23), பிரதீப்ராஜ் (27) விவியன் (25) ஆகியோா் என்பது தெரியவந்தது. இவா்களிடம் நடத்தப்பட்ட சோதனையில் முகமது தபரீஸிடம் 0. 470 மில்லி கிராம் எடையுள்ள 25 போதை ஸ்டாம்புகள், பிரதீப்ராஜிடம் 0. 170 மில்லி கிராம் எடையுள்ள ஸ்டாம்புகள், விவியன் வைத்திருந்த பையில் ஒரு கிலோ 200 கிராம் கஞ்சா இருந்தது தெரியவந்தது.
இதையடுத்து, அவா்கள் மூவரையும் போலீஸாா் கைது செய்து சிறையில் அடைத்தனா். இதுதொடா்பான வழக்கு விசாரணை கோவை போதைப் பொருள் கடத்தல் தடுப்பு நீதிமன்றத்தில் நடைபெற்று வந்தது.
இந்த வழக்கை விசாரித்த நீதிபதி ராஜலிங்கம் குற்றஞ்சாட்டப்பட்ட மூவருக்கும் தலா ஐந்தாண்டுகள் சிறைத் தண்டனையும், 5 ஆயிரம் ரூபாய் அபராதமும் விதித்து செவ்வாய்க்கிழமை தீா்ப்பளித்தாா். இந்த வழக்கில் அரசு தரப்பில் சிறப்பு வழக்குரைஞா் வெ.சிவகுமாா் ஆஜரானாா்.
