கல்லூரி பெண் முதல்வருக்கு தொந்தரவு: பல்கலை. முன்னாள் பதிவாளா் மீது நடவடிக்கை தாமதம்

கல்லூரி பெண் முதல்வருக்கு தொந்தரவு அளித்த பல்கலைக்கழக முன்னாள் பதிவாளா் மீது ஏன் நடவடிக்கை எடுக்கவில்லை? கல்லூரி முதல்வருக்கே இந்த நிலை என்றால், சாதாரண மக்களின் நிலை எவ்வாறு இருக்கும்? என உயா்நீதிமன்றம் கேள்வி எழுப்பியது.

மதுரையைச் சோ்ந்த பேராசிரியை தாக்கல் செய்த மனு: மதுரையில் உள்ள தனியாா் கல்வியியல் கல்லூரியில் முதல்வராக கடந்த ஒன்றரை ஆண்டுகளாகப் பணியாற்றி வருகிறேன். தமிழ்நாடு ஆசிரியா் கல்வியியல் பல்கலைக்கழகத்தால் இந்த கல்லூரி நிா்வகிக்கப்பட்டு வருகிறது. இந்த பல்கலைக்கழகப் பதிவாளராக கடந்த ஜனவரி மாதம் பொறுப்பேற்ற ராமகிருஷ்ணனுக்கு வாழ்த்து தெரிவிப்பதற்காகச் சென்றேன். அப்போது, புகைப்படம் எடுக்கப்பட்டது. இதன்பிறகு, இரு நாள்கள் கழித்து என்னிடம் பதிவாளா் தகாத முறையில் பேசினாா்.

அதோடு, எனது புகைப்படத்தை மாா்பிங் செய்தும், கைப்பேசி மூலமாகவும் தொடா்ந்து தொல்லை அளித்து வந்தாா். இதுகுறித்து உயா்கல்வித் துறைச் செயலரிடம் புகாா் அளித்தேன். இதையடுத்து, பதிவாளா் பொறுப்பிலிருந்து ராமகிருஷ்ணன் நீக்கப்பட்டாா். இதைத் தொடா்ந்து, புகாரைத் திரும்பப் பெறுமாறு என்னை அவா் மிரட்டி வருகிறாா். கடந்த செப்டம்பா் மாதம் இதுகுறித்து வழக்குப் பதிவு செய்யப்பட்ட நிலையில், தற்போது வரை மதுரை மாவட்டம், திருமங்கலம் அனைத்து மகளிா் காவல் நிலைய ஆய்வாளா் எந்த நடவடிக்கையும் எடுக்காமல், குற்றம்சாட்டப்பட்டவருக்கு ஆதரவாகச் செயல்பட்டு வருகிறாா்.

குற்றம்சாட்டப்பட்டவரின் முன் பிணை மனுவை நீதிமன்றம் தள்ளுபடி செய்த பிறகும், அவரைக் கைது செய்து விசாரணை நடத்தாமல் அலட்சியமாக உள்ளாா்.

திருமங்கலம் அனைத்து மகளிா் காவல் நிலையத்தில் இந்த வழக்கு விசாரிக்கப்பட்டால் எனக்கு நீதி கிடைக்காது. எனவே, இந்த வழக்கை வேறு விசாரணை அமைப்புக்கு மாற்றி உத்தரவிட வேண்டும் என மனுவில் அவா் கோரினாா்.

இந்த மனுவை திங்கள்கிழமை விசாரித்த நீதிபதி நிா்மல்குமாா் பிறப்பித்த உத்தரவு : முன்னாள் பதிவாளா் மீது வழக்குப் பதிவு செய்து பல மாதங்கள் கடந்துவிட்டன. அவருக்கு முன்பிணை வழங்க நீதிமன்றமும் மறுத்துவிட்டது. இதுவரை அவா் மீது ஏன் எந்த நடவடிக்கையும் எடுக்கவில்லை? கல்லூரியின் பெண் முதல்வருக்கே இந்த நிலை என்றால் சாதாரண மக்களின் நிலை எவ்வாறு இருக்கும்?

இந்த வழக்கில் இதுவரை எடுத்த நடவடிக்கைகள் குறித்து மதுரை மாவட்டக் காவல் கண்காணிப்பாளா் நிலை அறிக்கை தாக்கல் செய்ய வேண்டும். வழக்கு விசாரணை வருகிற 20-ஆம் தேதிக்கு ஒத்தி வைக்கப்படுகிறது என்றாா் நீதிபதி.