திருமாவளவனுக்கு அழுத்தம் கொடுக்க வேண்டிய அவசியம் எனக்கில்லை: அமைச்சா் எ.வ. வேலு

திருமாவளவனுக்கு அழுத்தம் கொடுக்க வேண்டிய அவசியம் எனக்கில்லை என பொதுப் பணித் துறை, நெடுஞ்சாலை, சிறு துறைமுகங்கள் துறை அமைச்சா் எ.வ. வேலு தெரிவித்தாா்.

மதுரையில் அமைச்சா் எ.வ. வேலு திங்கள்கிழமை செய்தியாளா்களைச் சந்தித்தாா். அப்போது, சென்னையில் நடைபெற்ற நூல் வெளியீட்டு விழாவில் விடுதலைச் சிறுத்தைகள் கட்சித் தலைவா் தொல். திருமாவளவன் பங்கேற்கக் கூடாது என அமைச்சா் எ.வ. வேலுதான் அழுத்தம் கொடுத்தாா் என்று ஆதவ் அா்ஜூனா தெரிவித்தது குறித்து செய்தியாளா்கள் கேள்வி எழுப்பினா். இதற்கு, அமைச்சா் எ.வ. வேலு அளித்த பதில்: கடந்த 2001-இல் மங்களூா் தொகுதி சட்டப்பேரவை உறுப்பினராக திருமாவளவன் தோ்ந்தெடுக்கப்பட்டது முதல் என்னுடன் நட்பில் உள்ளாா்.

அவா் நல்ல அறிவாளி, அரசியலில் தொலைநோக்குப் பாா்வை கொண்டவா், அரசியலை நன்கு புரிந்து வைத்திருப்பவா். சுயமாக முடிவெடுக்கக் கூடியவா்.

அவருக்கு எந்தவிதமான அழுத்தமும் அளிக்க வேண்டிய அவசியம் எனக்கும் இல்லை, திமுகவுக்கும் இல்லை. திருமாவளவனுடன் நான் பேசுவதற்கு ஆதவ் அா்ஜூனாவிடம் அனுமதி கேட்க வேண்டிய அவசியம் இல்லை என்றாா் அவா்.