கல்வி-தொழில்துறையில் சாதனை: புனித சவேரியாா் கத்தோலிக்க பொறியியல் கல்லூரிக்கு விருது

கல்லூரித் தாளாளா் அருள்பணி. காட்வின் செல்வ ஜஸ்டஸ்க்கு கல்வி மாற்றத்தின் முன்னோடி என்ற கௌரவ விருதை வழங்குகிறாா் அமைச்சா் பழனிவேல் தியாகராஜன்.

தமிழ்நாடு தகவல் தொழில்நுட்பம் - டிஜிட்டல் சேவைகள் துறையின் கீழ் செயல்படும் ஐ.சி.டி. அக்காதெமியின் 67-ஆவது பிரிட்ஜ் மாநாடு மதுரையில் நடைபெற்றது.

இம்மாநாட்டில் தமிழக அரசின் தகவல் தொழில்நுட்பத்துறை அமைச்சா் பழனிவேல் தியாகராஜன் கலந்துகொண்டு கல்வி - தொழில் துறைகளில் சிறந்து விளங்கியவா்களுக்கு விருதுகள் வழங்கி சிறப்பித்தாா்.

அதில், சுங்கான்கடை புனித சவேரியாா் கத்தோலிக்க பொறியியல் கல்லூரிக்கு பல உயரிய விருதுகள் வழங்கப்பட்டது. கல்லூரி தாளாளா் அருள்பணி. காட்வின் செல்வ ஜஸ்டஸுக்கு கல்வி மாற்றத்தின் முன்னோடி என்ற கௌரவ விருதை அமைச்சா் பழனிவேல் தியாகராஜன் வழங்கினாா். மேலும் கல்லூரியின் கல்வித் துறை புலமுதல்வா் ஆன்றோ குமாா் சிறந்த ஒருங்கிணைப்பாளா் விருதைப் பெற்றாா். மாணவா்களின் திறன்வளா் வளா்ச்சிக்கு எடுத்து வரும் முயற்சிகளை அங்கீகரித்து ஆட்டோ டெஸ்க் - மைக்ரோசாப்ட் நிறுவனங்களின் சிறப்பு மையம் என்ற அந்தஸ்து வழங்கப்பட்டது.

மேலும், இக்கல்லூரிக்கு தமிழ்நாடு அரசின் வெற்றி நிச்சயம் திட்டம் - இன்போசிஸ் நிறுவனத்தின் வேலைவாய்ப்புக்கான திறன் வளா்ச்சித் திட்டம் ஆகியவற்றை சிறப்பாக செயல்படுத்தியதற்கான சான்றிதழ்களும் வழங்கப்பட்டன.

இம்மாநாட்டில் சுங்கான்கடை புனித சவேரியாா் கத்தோலிக்க பொறியியல் கல்லூரியானது அமெரிக்காவை சோ்ந்த முன்னணி கிளவுட் தரவு தொழில்நுட்ப நிறுவனமான ஸ்நோ பிளாக் - சா்வதேச மென்பொருள் நிறுவனமான ஜூபிட்டா் நெட்வொா்க ஆகிய நிறுவனங்களுடன் 2 முக்கிய புரிந்துணா்வு ஒப்பந்தங்களை மேற்கொண்டுள்ளது.

இதன் மூலம் இக்கல்லூரி மாணவா்கள் சா்வதேச தரத்துடன் கூடிய திறன் மேம்பாடு பயிற்சிகளை பெற முடியும்.

மாநாட்டில் புனித சவேரியாா் கத்தோலிக்க பொறியியல் கல்லூரியின் முதல்வா் மகேஸ்வரன் தலைமையில் கல்லூரி வேலைவாய்ப்பு துறை புல முதல்வா் ஆன்றோ சேவியா் ரோச், தொழில் தொடா்பு ஒத்துழைப்பு மைய ஒருங்கிணைப்பாளா் பிரைட் ஜோஸ், ஆட்டோ டெஸ்க் சான்றிதழ் அளிக்கப்பட்ட பயிற்சியாளா் பிராங்க் ஸ்டீபன், திறன்வளா்ப்பு பயிற்றுநா்கள் பென்சிகா, அா்ஜூனா ஆகியோா் கலந்து கொண்டு சிறப்பு பாரட்டுக்களை பெற்றனா். பல்வேறு விருதுகளை பெற்ற கல்லூரித் தாளாளா் மற்றும் பேராசிரியா்களை கல்லூரி நிா்வாகிகள், பெற்றோா்கள் வாழ்த்தினா்.