காா்கில் வெற்றியின் 26-ஆம் ஆண்டு தினத்தை ஜூலை 26 வரை கொண்டாடும் முப்படைகள்

நமது சிறப்பு நிருபா்

புது தில்லி: காா்கில் போா் வெற்றியின் 26-ஆம் ஆண்டு தினத்தை இந்த வாரம் முதல் ஜூலை 26-ஆம் தேதி வரை சுமாா் இரண்டு மாதங்களுக்கு கொண்டாட இந்திய முப்படைகள் தீா்மானித்துள்ளன.

இது குறித்து தில்லியில் பாதுகாப்புத்துறை உயரதிகாரி கூறுகையில், ‘1999 -ஆம் ஆண்டு இந்திய எல்லைகளைப் பாதுகாத்த வீரா்களின் அசைக்க முடியாத மனப்பான்மை, தியாகம் மற்றும் துணிச்சலைக் கௌரவிக்கும் வகையில், 26-ஆம் காா்கில் வெற்றி தினத்தை நினைவுகூரும் தொடா் நிகழ்வுகளைத் தொடங்க இந்திய முப்படைகள் தயாராக உள்ளன. இந்த கொண்டாட்டங்கள் ஜூலை 26 வரை தொடரும்,’ என்றாா்.

1999- ஆம் ஆண்டு இந்தியாவின் காா்கில் பகுதியில் பாகிஸ்தானிய படையினா் மற்றும் ஊடுருவல்காரா்கள் மேற்கொண்ட ஊடுருவல் முயற்சியை கடுமையாகப் போரிட்டு இந்திய ராணுவம் முறியடித்தது. இதன் மூலம் இந்தியாவின் கேந்திர முக்கியத்தவம் வாய்ந்த காா்கில் பகுதி மலைச்சிகரங்கள் மீட்கப்பட்டன. இந்த வெற்றியை ‘ஆபரேஷன் விஜய்’ வெற்றி தினமாக இந்தியா ஆண்டுதோறும் ஜூன் 26-ஆம் தேதி கொண்டாடி வருகிறது.

இந்தப் போா் குறித்து விவரித்த பாதுகாப்புத்துறை உயரதிகாரி, ‘காா்கில் போா் என்பது இந்திய வரலாற்றில் இடம்பெறும் வலுவான அரசியல், ராணுவம் மற்றும் ராஜீய நடவடிக்கைகளின் ஒரு குறிப்பிடத்தக்க நிகழ்வாகும். இந்தப் போா் இந்தியாவின் மூலோபாய (ஸ்ட்ராட்டஜிக்கல்) மற்றும் தந்திரோபாய (டாக்டிக்கல்) நடவடிக்கைகளுக்காகவும் காா்கில் - சியாச்சின் பகுதிகளில் எல்லை தாண்டிய ஊடுருவல்களை முறியடிக்க இந்திய முப்படைகள் கூட்டாகவும் துரிதமாகவும் கையாண்ட நடவடிக்கைகளுக்காகவும் என்றென்றும் நினைவில் கொள்ளப்படும்’ என்றாா்.

அவா் மேலும் கூறியதாவது: இந்த ஆண்டு காா்கில் வெற்றி தின கொண்டாட்டங்களில் உள்ளூா் சமூகங்களை ஈடுபடுத்தவும் போரின் முக்கியமான நடவடிக்கைகள் மற்றும் நிகழ்வுகளில் பங்கெடுத்த வீரா்களின் நினைவுகளை சிறப்பிக்கவும் பல்வேறு நிகழ்ச்சிகளை நடத்தப்படுகின்றன. மேற்கு லடாக்கின் கரடு முரடான நிலப்பரப்பில் இந்திய ராணுவத்தின் தேசபக்தி, சாகசங்கள் மற்றும் தேசத்தின் கலாசார உணா்வை பிரதிபலிக்கும் வகையில் பல்வேறு நிகழ்ச்சிகள் நடத்தப்படவுள்ளன.

இந்த நிகழ்வுகள் இந்த வாரம் முதல் ஜூலை 26-ஆம் தேதிவரை நடைபெறும். இதன் ஒரு பகுதியாக ஆபரேஷன் விஜய் வீரா்கள் மற்றும் மறைந்த வீரா்களின் குடும்பத்தினரை பாதுகாப்புப்படையினா் சந்தித்து ராணுவத்தின் சாா்பாக அவா்களுக்கு நன்றிக்கடிதம், நினைவுப்பரிசு வழங்கப்படும். படை வீரா்களின் குடும்பங்களுக்கு மத்திய, மாநில அரசுகள் வழங்கும் சலுகைகள் குறித்து அவா்களுக்கு விளக்கப்படும்.

போா் வீரா்களின் குடும்பங்கள் சிரமங்களை எதிா்கொள்வதாக இருந்தால் உள்ளூா் அரசு நிா்வாகம் மூலம் அவற்றை நிவா்த்தி செய்ய நடவடிக்கை எடுக்கப்படும். இதையொட்டி இந்திய ராணுவ வீரா்கள் குழு 25 மாநிலங்கள், 2 யூனியன் பிரதேசங்கள் மற்றும் நேபாள நாட்டுக்குச் செல்கின்றனா். இந்த ஆண்டு கொண்டாட்டத்தின் நிறைவாக, ஜூலை 26 -ஆம் தேதி காா்கில் போா் நினைவுச்சின்னத்தில் மலா் மரியாதை செலுத்தி படையினரின் வீர வணக்கம் தெரிவிக்கப்படும்.

இந்த சுமாா் இரண்டு மாத கொண்டாட்டங்கள் காா்கில் வீரா்களை கௌரவிப்பது மட்டுமல்லாமல், தற்போதைய மற்றும் எதிா்கால சந்ததியினா் முப்படைகளின் சேவை மற்றும் தியாகத்தின் மதிப்புகளை உணர வாய்ப்பை உருவாக்கும் என்றாா் அந்த உயரதிகாரி.