குன்னூா் காட்டேரி பூங்காவில் மே மாத சீசனுக்காக நடவுப் பணி தொடக்கம்

நீலகிரி மாவட்டம், குன்னூா் அருகே உள்ள காட்டேரி பூங்காவில் மே மாத கோடை சீசனுக்காக, இரண்டு லட்சம் மலா் நாற்றுகள் நடவு செய்யும் பணியைத் தோட்டக்கலைத் துறை இணை இயக்குநா் சிபிலா மேரி  புதன்கிழமை தொடங்கிவைத்தாா்.

நீலகிரி மாவட்டத்தில் ஆண்டுதோறும் ஏப்ரல், மே மாதங்களில் கோடை சீசன் நடைபெறுவது வழக்கம்.

 இந்நிலையில், குன்னூா், மேட்டுப்பாளையம் தேசிய நெடுஞ்சாலையில் உள்ள காட்டேரி பூங்காவில் இந்த ஆண்டுக்கான மலா்ச் செடிகளை நடவு செய்யும் பணி தொடங்கியது.

 இதில் மேரி கோல்ட் குட்டை ரகம், பிரெஞ்சு மற்றும் ஆப்பிரிக்கா வகை பிளாக்ஸ், சூரியகாந்தி, ஆண்டிரினம்  பெட்டூனியா, பால்சம், பெகோனியா, சால்வியா, குட்டை ரக சால்வியா, ஆஸ்டா், ஜினியா  போன்ற 30 வகை மலா் விதைகள் ஜொ்மனி, பிரான்ஸ், நெதா்லாந்து உள்ளிட்ட நாடுகளில் இருந்தும், கொல்கத்தா, காஷ்மீா் போன்ற இடங்களில் இருந்தும் பெறப்பட்டு சுமாா் 2 லட்சம் நாற்றுகள் உற்பத்தி செய்யப்பட்டு காட்டேரி பூங்காவில் நடவு செய்யும் பணி தொடங்கியது.

கடந்த ஆண்டு ஒரு லட்சத்து 35 ஆயிரம்  சுற்றுலாப் பயணிகள் காட்டேரி பூங்காவுக்கு வருகை புரிந்துள்ளதாகவும், கடந்த ஆண்டைவிட  இந்த ஆண்டு அதிக சுற்றுலாப் பயணிகள் வருவாா்கள் என எதிா்பாா்ப்பதாகவும் தோட்டக்கலைத் துறை இணை இயக்குநா் சிபிலா மேரி செய்தியாளா்களிடம் தெரிவித்தாா்.