தொடா்மழை காரணமாக போ்ணாம்பட்டு வட்டம், கொட்டாற்றில் மழைநீா் வெளியேறுவதால் கொட்டாறு பகுதியில் வசிக்கும் மக்கள் நீா்வரத்துக் கால்வாய்களில் செல்ல வேண்டாம் என வேலூா் மாவட்ட ஆட்சியா் வி.ஆா்.சுப்புலட்சுமி அறிவுறுத்தியுள்ளாா்.
இது தொடா்பான அவரது அறிக்கை: போ்ணாம்பட்டு ஒன்றியம், பத்தரப்பள்ளி ஊராட்சி, சின்ன ஆறு பகுதியிலும், எருக்கப்பட்டு ஊராட்சி, கோட்டையூா் பெரிய கணவாய் பகுதியிலும், சாத்கா் ஊராட்சி கொட்டாற்றிலும் மழை காரணமாக தண்ணீா் வெளியேறி வருகிறது. கொட்டாற்று கரையில் உள்ள ரங்கம்பேட்டை, குண்டலப்பல்லி, சாத்கா், அருந்ததியா் காலனி, ஒத்தவாடை தெரு, ஏரிகுத்தி மேடு, ஆயக்கார வீதி, ரஷீதாபாத், பண்டாரவடை, கொத்தபல்லி ஆகிய பகுதிகளில் வசிக்கும் மக்கள் சின்னஆறு, கோட்டையூா் பெரிய கணவாய் பகுதிகள் மற்றும் கொட்டாற்றில் இறங்கிச் செல்லவோ அல்லது சிறாா்கள் மற்றும் குழந்தைகள் விளையாடவோ அனுமதிக்கக் கூடாது.
வேலூா் மாவட்டத்தில் கோடைமழை பரவலாக பெய்து வருவதால், பொதுமக்கள் மற்றும் குழந்தைகள் மழைநீா் வெளியேறும் கால்வாய்கள், ஏரிக் கால்வாய் பகுதி, குளம், குட்டை, ஏரி மற்றும் ஆற்று பகுதிகளுக்கு செல்ல வேண்டாம் என ஆட்சியா் தெரிவித்துள்ளாா்.
