சட்டப்பேரவை உறுதிமொழிக் குழு நாளை வருகை: அலுவலா்களுடன் கடலூா் ஆட்சியா் ஆலோசனை

நெய்வேலி: கடலூா் ஆட்சியா் அலுவலகத்தில் தமிழ்நாடு சட்டப்பேரவை உறுதிமொழிக் குழு வருகை தொடா்பாக முன்னேற்பாடு பணிகள் குறித்து அனைத்துத் துறை அலுவலா்களுடனான ஆலோசனைக் கூட்டம் திங்கள்கிழமை நடைபெற்றது.

கூட்டத்துக்கு தலைமை வகித்த ஆட்சியா் சிபி ஆதித்யா செந்தில்குமாா் கூறியதாவது:

தமிழ்நாடு சட்டப்பேரவை உறுதிமொழிக் குழு கடலூா் மாவட்டத்தில் புதன்கிழமை (மே 21) ஆய்வு மேற்கொள்ள உள்ளது. முதல்கட்டமாக இந்தக் குழுவினா் காலையில் பல்வேறு இடங்களில் நேரிடையாக சென்று பாா்வையிட்டு ஆய்வு மேற்கொள்ள உள்ளனா். பின்னா், அனைத்துத் துறை அலுவலா்களுடன் மாவட்ட ஆட்சியா் அலுவலகக் கூட்டரங்கில் விரிவான ஆய்வுக் கூட்டம் நடைபெறும்.

உறுதிமொழிக் குழுத் தலைவா் தி.வேல்முருகன் (பண்ருட்டி) எம்எல்ஏ தலைமையில், உறுப்பினா்கள் எஸ்.அரவிந்த் ரமேஷ் (சோழிங்கநல்லூா்), ரா.அருள் (சேலம் மேற்கு), மு.சக்கரபாணி (வானூா்), ஏ.ஆா்.ஆா்.சீனிவாசன் (விருதுநகா்), ஜி.தளபதி (மதுரை), ஏ.நல்லதம்பி (திருப்பத்தூா்), எம்.பூமிநாதன் (மதுரை தெற்கு), ஆா்.மணி (ஓமலூா்), எஸ்.மாங்குடி (காரைக்குடி), எம்.கே.மோகன் (அண்ணாநகா்), எஸ்.ஜெயக்குமாா் (பெருந்துறை) ஆகியோருடன் செயலக அலுவலா்கள் வருகை தரவுள்ளனா்.

இந்தக் குழு வருகையின் போது பணி அலுவலா்கள் தங்களுக்கு ஒதுக்கீடு செய்யப்பட்ட பணிகளில் சிறப்பு கவனம் செலுத்தி பணிகளை நிறைவாக முடித்திட அனைத்து அலுவலா்களும் ஒருங்கிணைந்து செயலாற்ற வேண்டும் என்றாா் ஆட்சியா்.

கூட்டத்தில் மாநகராட்சி ஆணையா் எஸ்.அனு, மாவட்ட ஆட்சியரின் நோ்முக உதவியாளா் (வளா்ச்சி) திருவேங்கிடம், மாவட்ட ஆட்சியரின் நோ்முக உதவியாளா் (பொது) ரவி மற்றும் அரசு அலுவலா்கள் பலா் கலந்து கொண்டனா்.