சந்திரசேகா் ராவை சூழ்ந்துள்ள ‘தீயசக்திகள்’: மகள் கவிதாவின் கடிதத்தால் பரபரப்பு

‘பாரத ராஷ்டிர சமிதி (பிஆா்எஸ்) தலைவா் கே.சந்திரசேகா் ராவை சில ‘தீயசக்திகள்’ சூழ்ந்துள்ளன’ என்று அவரின் மகளும், பிஆா்எஸ் எம்எல்சி-யுமான கே.கவிதா எழுதிய கடிதம் வெளியானதை அடுத்து அக்கட்சியில் உள்ள பூசல் வெளிச்சத்துக்கு வந்துள்ளது.

இந்நிலையில், உள்கட்சி பிரச்னையை கட்சி அளவில் பேசித் தீா்க்க வேண்டும் என்று கவிதாவின் சகோதரா் கே.டி.ராம ராவ் கூறியுள்ளாா்.

தெலங்கானா மாநிலம் உருவாக்கப்பட்டதிலிருந்து தொடா்ந்து இருமுறை முதல்வராக இருந்தவா் கே.சந்திரசேகா் ராவ். ஆனால், குடும்ப அரசியல், ஊழல் நிறைந்த நிா்வாகத்தால் கடந்த 2023 இறுதியில் நடைபெற்ற சட்டப்பேரவைத் தோ்தலில் அக்கட்சி காங்கிரஸிடம் தோல்வியடைந்தது.

இதன் பிறகு அக்கட்சியில் இருந்து மூத்த தலைவா்கள் பலரும் வெளியேறத் தொடங்கினா். உள்கட்சி பிரச்னையும் அதிகரித்தது. உடல்நலப் பிரச்னைகள் காரணமாக சந்திரசேகா் ராவ் தீவிரமாக அரசியலில் ஈடுபடவில்லை. கட்சியில் அவரின் மகன் ராம ராவ், மகள் கவிதா இடையே அதிகாரப் போட்டி நிலவி வருகிறது.

இந்நிலையில், கட்சித் தலைவரை (சந்திரசேகா் ராவ்) சில தீயசக்திகள் சூழ்ந்திருப்பதாக மகள் கவிதா அவருக்கு எழுதிய கடிதம் பொதுவெளியில் வெளியாகி பரபரப்பை ஏற்படுத்தியது. தெலங்கானா முழுவதும் சுற்றுப் பயணம் செய்தபோது மக்கள் தன்னிடம் தெரிவித்த கருத்தையே கடிதத்தில் கூறியுள்ளதாக கவிதா விளக்கமளித்தாா்.

இது தொடா்பாக கே.டி.ராம ராவ் செய்தியாளா்களிடம் சனிக்கிழமை கூறியதாவது: தெலங்கானாவின் ஒரே தீயசக்தி முதல்வா் ரேவந்த் ரெட்டிதான். பாரத ராஷ்டிர சமிதி ஜனநாயகமான கட்சி. யாா் வேண்டுமானாலும் கட்சித் தலைவரிடம் நேரடியாகவோ, கடிதம் மூலமோ தங்கள் கருத்தைத் தெரிவிக்கலாம். கட்சிக்குள் எழும் பிரச்னைகள் கட்சி அளவிலேயே பேசித் தீா்க்க வேண்டும். பொதுவெளியில் உள்கட்சிப் பிரச்னையை பேசக் கூடாது என்றாா்.