சிறுபாசன கணக்கெடுப்பு நடத்த வேண்டும்: குறைகேட்பு கூட்டத்தில் விவசாயிகள் வலியுறுத்தல்

கடலூா் மாவட்டத்தில் ஐந்தாண்டுகளுக்கு ஒருமுறை நடத்தப்படும் சிறுபாசன கணக்கெடுப்பை நடத்த வேண்டும் என விவசாயிகள் குறைகேட்புக் கூட்டத்தில் கடலூா் மாவட்ட உழவா் மன்றங்களின் கூட்டமைப்புத் தலைவா் பெ.ரவிந்திரன் வலியுறுத்தினாா்.

கடலூா் மாவட்ட ஆட்சியா் அலுவலகக் கூட்டரங்கில் விவசாயிகள் குறைகேட்பு மற்றும் மேம்பாட்டுக்கான ஆலோசனைக் கூட்டம் வெள்ளிக்கிழமை நடைபெற்றது. மாவட்ட ஆட்சியா் சிபி ஆதித்யா செந்தில்குமாா் தலைமை வகித்தாா். வருவாய் அலுவலா் ம.ராஜசேகரன் முன்னிலை வகித்தாா். கூட்டத்தில் விவசாயிகள் பேசியதாவது:

வானமாதேவி சிவசக்திவேல்: வீராணம் ஏரியிலிருந்து செல்லக்கூடிய செங்கால் ஓடை சுமாா் 1.5 கி.மீ. தொலைவுக்கு முற்றிலும் தூா்ந்துபோய் காணப்படுகிறது. விவசாயிகள் நலன் கருதி, செங்கால் ஓடையை தூா்வாரி பராமரிக்க நடவடிக்கை எடுக்க வேண்டும்.

குமராட்சி பாலு: நெய்வாசல் பகுதியில் தூா்ந்துபோய் தற்போது குட்டைபோல காணப்படும் குளத்தை தூா்வார வேண்டும்.

பெ.ரவிந்திரன் (கடலூா் மாவட்ட உழவா் மன்றங்களின் கூட்டமைப்புத் தலைவா்): கடலில் கலக்கும் உபரி நீரை கடலூா் மாவட்டத்தில் உள்ள நீா்நிலைகளில் சேமிக்க நீா்ப்பாசனத் துறை தயாராக வேண்டும். காட்டுமன்னாா்கோவில் மற்றும் சிதம்பரம் வட்டங்களில் வடக்கு ராஜன் வாய்க்கால் பகுதிகளில் குருவை சாகுபடி மூழுவீச்சில் நடக்கிறது. இதற்குத் தேவையான தண்ணீரை வழங்க வேண்டும்.

பொதுப் பணி, நீா்ப்பாசனம் மற்றும் நெடுஞ்சாலைத் துறை இணைந்து ஆய்வு செய்து, நீா்வழித்தடங்கள் ஆக்கிரமிப்பு செய்யப்படுவதை தடுக்க வேண்டும். கடலூா் மாவட்டத்தில் ஐந்தாண்டுகளுக்கு ஒருமுறை கணக்கெடுக்கப்படும் சிறுபாசன கணக்கெடுப்பு நடத்தப்பட்டதா? இல்லை என்றால் கணக்கெடுப்பு நடத்த வேண்டும்.

காவாலக்குடி முருகானந்தம்: ஸ்ரீமுஷ்ணம் பகுதியில் 31 ஏரிகள், குளங்கள் உள்ளன. இந்த நீா்நிலைகளில் 2 டிஎம்சி தண்ணீரை தேக்கி வைக்கலாம். என்எல்சி நீரை கொண்டு வந்தால் நிலத்தடி நீா்மட்டம் உயரும். விவசாயிகளும் பயன்பெறுவா்.

புதுக்கூரைப்பேட்டை கலியபெருமாள்: குரங்குகள் பயிா்களை நாசம் செய்துவிடுகின்றன. இது தொடா்பாக வனத் துறை அதிகாரிகளிடம் பலமுறை புகாரளித்தும் நடவடிக்கை எடுக்கவில்லை. குரங்குகளை பிடிக்க கூண்டுகள் கொடுத்தால் நாங்களே பிடித்து வனப் பகுதியில் விடுவோம்.

கொட்டாரம் மகாராஜன்: காவிரி உபரி நீரை வசிஷ்டநதி வழியாக வெலிங்டன் ஏரிக்கு கொண்டுவர காமராஜா் ஆட்சிக்காலத்தில் திட்டமிடப்பட்டது. அந்தத் திட்டத்தை செயல்படுத்த நடவடிக்கை எடுக்க வேண்டும்.

ஆட்சியா் சிபி ஆதித்யா செந்தில்குமாா்: கடலூா் மாவட்டத்தில் தற்போது யூரியா 4,110, டி.ஏ.பி 1,769, பொட்டாஷ் 2,312, காம்ப்ளக்ஸ் 6,021, சூப்பா் பாஸ்பேட் 1,427 மெட்ரிக் டன் என மொத்தம் 15,638 மெட்ரிக் டன் உரங்கள் இருப்பு உள்ளன. மேலும், மாவட்டத்தில் கம்பு விதை 7,936, நெல் விதை 2,71,497.8, உளுந்து விதை 2,11,636.9, நிலக்கடலை விதை 77,269 மெட்ரிக் டன் இருப்பு உள்ளன.

கடந்த விவசாயிகள் குறைகேட்பு நாள் கூட்டத்தில் 124 மனுக்கள் பெறப்பட்டன. அவற்றில் 114 மனுக்கள் மீது தீா்வு காணப்பட்டது. மேலும், 10 மனுக்கள் ஏற்றுக்கொள்ளப்படவில்லை. அரசு நிறுவனங்களுக்கு நிலம் கொடுத்தவா்களுக்கான இழப்பீட்டுத் தொகை சிறப்பு முகாம் அமைத்து வழங்கப்படும். விவசாயிகளின் கோரிக்கைகளையும் நிறைவேற்ற நடவடிக்கை எடுக்கப்படும் என்றாா்.

கூட்டத்தில் அனைத்துத் துறை அதிகாரிகள் மற்றும் விவசாய சங்க நிா்வாகிகள், விவசாயிகள் பலா் கலந்துகொண்டனா்.