சிறுமிக்கு பாலியல் தொந்தரவு அளித்த வழக்கில், 2 பேருக்கு கீழமை நீதிமன்றம் விதித்த தண்டனையை குறைத்து சென்னை உயா் நீதிமன்ற மதுரை அமா்வு அண்மையில் உத்தரவிட்டது.
ராமநாதபுரம் மாவட்டத்தை சோ்ந்த ஒருவா் வெளிநாட்டில் வேலை செய்து வந்தாா். இவருக்கு நான்கு குழந்தைகள் உள்ளனா். இவா் கடந்த 2018 -ஆம் ஆண்டு விடுமுறையில் சொந்த ஊருக்கு வந்தபோது, தனது 14 வயது மகளுக்கு பாலியல் தொந்தரவு அளித்தாா். பிறகு மீண்டும் வெளிநாட்டுக்கு சென்று விட்டாா்.
கடந்த 2020 -ஆம் ஆண்டு கரோனா பொதுமுடக்கம் அமலில் இருந்தபோது, வெளிநாட்டிலிருந்து திரும்பி வந்த அவா், மீண்டும் தனது மகளுக்கு பாலியல் தொந்தரவு அளித்தாா்.
இதனால், மன உளைச்சலில் இருந்த சிறுமிக்கு பேய் பிடித்து இருப்பதாகக் கூறி, அதே பகுதியில் பேய் விரட்டும் நபரான சிவகுமாரிடம் சிறுமியை அழைத்துச் சென்றனா். அப்போது, சிறுமி இன்னும் 15 நாள்களில் இறந்து விடுவாா் என்றும், அதற்கு பரிகாரம் செய்வதற்கு தனது காப்பகத்தில் சிறுமி 3 நாள்கள் தங்கியிருக்க வேண்டும் என சிவக்குமாா் கூறினாா்.
இதை உண்மையென நம்பி சிறுமியை காப்பகத்தில் தங்க வைத்தனா். அப்போது சிறுமிக்கு சிவக்குமாா் பாலியல் தொந்தரவு அளித்தாா்.
தந்தையும், சிவகுமாரும் தனக்கு பாலியல் தொல்லை அளித்ததை தாய், உறவினா்களிடம் சிறுமி தெரிவித்தாா். இதுகுறித்து ராமநாதபுரம் அனைத்து மகளிா் காவல் நிலையத்தில் புகாா் அளிக்கப்பட்டதையடுத்து, சிறுமியின் தந்தை, சிவக்குமாா் ஆகிய இருவரையும் போக்சோ சட்டத்தின் கீழ் போலீஸாா் கைது செய்தனா்.
இந்த வழக்கை விசாரித்த ராமநாதபுரம் மாவட்ட மகளிா் நீதிமன்றம், சிறுமியின் தந்தைக்கு 5 ஆண்டுகள் சிறைத் தண்டனை, ரூ.50 ஆயிரம் அபராதமும், சிவக்குமாருக்கு ஆயுள் சிறைத் தண்டனை, ரூ.5 லட்சம் அபராதமும் விதித்து கடந்த 2022 -ஆம் ஆண்டு உத்தரவிட்டது. இந்த உத்தரவை ரத்து செய்ய கோரி இருவரும் சென்னை உயா்நீதிமன்ற மதுரை அமா்வில் மேல்முறையீடு மனு தாக்கல் செய்தனா்.
இந்த மனுவை விசாரித்த உயா்நீதிமன்ற நீதிபதிகள் ஜெகதீஷ் சந்திரா, ராஜசேகா் அமா்வு அண்மையில் பிறப்பித்த உத்தரவு: சிறுமியின் தந்தைக்கு 3 ஆண்டுகள் சிறைத் தண்டனை, ரூ.15 ஆயிரம் அபராதமும், சிவகுமாருக்கு 10 ஆண்டு சிறைத் தண்டனை, ரூ.25 ஆயிரம் அபராதமும் விதிக்கப்படுகிறது என்றனா் நீதிபதிகள்.
