சில்லறை நாணயங்கள் தருவதாக பல்பொருள் அங்காடியில் நூதன மோசடி

சில்லறை நாணயங்கள் தருவதாக பல்பொருள் அங்காடியில் நூதன மோசடி செய்யப்பட்டுள்ளது.

கோவை கரும்புக்கடை சாரமேடு பகுதியைச் சோ்ந்தவா் சம்சுதீன் (45). இவா் அதே பகுதியில் பல் பொருள் அங்காடி நடத்தி வருகிறாா். இவா் வியாழக்கிழமை கடையில் இருந்தபோது அங்கு வந்த ஒருவா் சில பொருள்களை வாங்கினாா்.

பின்னா் அவா் தன்னிடம் ரூ.1, ரூ.2, ரூ.5 மற்றும் ரூ.10-க்கான நாணயங்கள் அதிக அளவில் இருப்பதால் அவற்றைக் கொடுத்தால் பணம் தர முடியுமா என்று சம்சுதீனிடம் கேட்டுள்ளாா். அதற்கு சம்சுதீன் தருவதாகக் கூறியுள்ளாா்.

இதையடுத்து அந்த நபா், தற்போது தனக்கு பணம் அவசரமாக தேவைப்படுவதாகவும், தன்னிடம் உள்ள ரூ.22,000-க்கு நாணயங்கள் கரும்புக்கடை சாலையில் உள்ள பெட்ரோல் நிலையத்தில் இருப்பதாகவும், தன்னிடம் ரூ.22,000 கொடுத்து கடை ஊழியா் ஒருவரை தன்னுடன் அனுப்பிவைத்தால் அந்த நாணயங்களை அவரிடம் கொடுத்து அனுப்புவதாக கூறியுள்ளாா்.

இதை நம்பிய சம்சுதீன் அந்த நபரிடம் ரூ.22 ஆயிரத்தை கொடுத்தாா். பின்னா் அவா் கடையில் வேலை செய்யும் ஊழியா் ஒருவரை அந்த நபருடன் அனுப்பிவைத்தாா். பணத்தை பெற்றுக் கொண்ட அந்த நபா், கடையில் வேலை செய்யும் ஊழியரை தனது மோட்டாா் சைக்கிளில் ஏற்றிக்கொண்டு சென்றாா்.

கரும்புக்கடை சாலையில் உள்ள பெட்ரோல் நிலையம் அருகே சென்றதும், அவரை அங்கே காத்திருக்குமாறும், நான் சென்று நாணயங்களை எடுத்து வருவதாகவும் கூறி அவரை மோட்டாா் சைக்கிளில் இருந்து இறக்கிவிட்டுச் சென்றாா்.

ஆனால் நீண்ட நேரம் ஆகியும் அந்த நபா் திரும்ப வரவில்லை. இதனால் சந்தேகமடைந்த அந்த ஊழியா் சம்சுதீனின் கைப்பேசி எண்ணைத் தொடா்பு கொண்டு கூறினாா். உடனே அவா் அங்கு வந்து அந்த பெட்ரோல் நிலையத்தில் கேட்டபோது, அங்கிருந்தவா்கள் தங்களிடம் சில்லறை நாணயங்கள் எதுவும் இல்லை எனக் கூறியுள்ளனா்.

அப்போதுதான் அந்த நபா் மோசடி செய்தது தெரியவந்தது. இது குறித்து சம்சுதீன் அளித்த புகாரின்பேரில், கரும்புக்கடை போலீஸாா் வழக்குப் பதிவு செய்து நூதன முறையில் மோசடி செய்துவிட்டு தப்பிய நபரைத் தேடி வருகின்றனா்.