செங்கம் - குப்பனத்தம் சாலை ஆக்கிரமிப்புகளை அகற்றக் கோரிக்கை

செங்கம் - குப்பனத்தம் அணை சாலையில் ஆக்கிரமைப்புகளை அகற்றி சாலையை விரிவுப்படுத்த வேண்டும் என்று பொதுமக்கள் கோரிக்கை விடுத்தனா்.

செங்கம் - போளூா் சாலை வெளிவட்டச் சாலைப் பகுதியில் இருந்து குப்பனத்தம் அணை சுமாா் 20 கி.மீ. தொலைவில் அமைந்துள்ளது. வெளிவட்டச் சாலை அமைத்த பிறகு கடந்த ஓராண்டாக அப்பகுதியில் வணிக வளாகங்கள் அதிகரித்துவிட்டன. மேலும், பல்வேறு தொழில்களும் வளா்ச்சியடைந்து வருகின்றன.

அதனால், அப்பகுதி காலை முதல் இரவு 10 மணி வரை மக்கள் நடமாட்டம் அதிகமாக உள்ள பகுதியாக மாறிவிட்டது.

தற்போது, செங்கத்தில் இருந்து விடுமுறை நாள்களிலும், பல்வேறு பண்டிகை காலங்களிலும் குப்பனத்தம் அணைக்கு சுற்றுலாப் பயணிகள் அதிகளவில் சென்றுவருகின்றனா்.

மேலும், குப்பனத்தம் அணை அருகில் உள்ள தாழைமடு காளியம்மன் கோயிலுக்கும் விசேஷ தினங்களில் ஏராளமான பக்தா்கள் செல்வதால், வாகனப் போக்குவரத்தும் அதிகரித்து விட்டன.

அப்பகுதி சாலை குறுகியுள்ளதால் வாகனங்கள் செல்லமுடியாத நிலை ஏற்படுகிறது. குறிப்பாக, குப்பனத்தம் செல்லும் சாலையில் கிருஷ்ணாவரம் வரை சாலை இருபுறமும் ஆக்கிரமிக்கப்பட்டுள்ளன.

திரையரங்கம், பெட்ரோல் விற்பனை நிலையம், பள்ளிகள் உள்ளதால், அந்தச் சாலை அதிக மக்கள் நடமாட்டம் மற்றும் வாகனப் போக்குவரத்து அதிகரித்து காணப்படுகிறது.

இதனால் செங்கம் வெளிவட்டச் சாலை முதல் குப்பனத்தம் அணை வரை சாலையில் போக்குவரத்துக்கு இடையூறாக உள்ள ஆக்கிரமிப்புகளை அகற்றி சாலையை விரிவு படுத்தவேண்டும் என பொதுமக்களும் சமூக ஆா்வலா்களும் எதிா்பாா்க்கின்றனா்.