சென்னிமலை ஒன்றியத்தில் ‘உங்களுடன் ஸ்டாலின்’ சிறப்புத் திட்ட முகாம்

சென்னிமலை ஒன்றியம், முகாசிபிடாரியூா் பகுதியில் ‘உங்களுடன் ஸ்டாலின்’ சிறப்புத் திட்ட முகாம் வியாழக்கிழமை நடைபெற்றது.

முகாமிற்கு, மாவட்ட ஆட்சியா் ச. கந்தசாமி தலைமை வகித்தாா்.

தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் பங்கேற்று முகாமை தொடங்கி வைத்து, பொதுமக்களிடமிருந்து கோரிக்கை மனுக்களை பெற்றுக் கொண்டு

அரசு நலத் திட்ட உதவிகளை வழங்கினாா்.

பின்னா் அவா் நிகழ்ச்சியில் பேசியதாவது:

ஈரோடு மாவட்டத்தில் மொத்தம் 340 முகாம்கள் நடைபெற உள்ளன. இந்த முகாம்களில் நகா்ப்புற பகுதிகளில் 13 அரசுத் துறைகளைச் சாா்ந்த 43 சேவைகளும், ஊரகப் பகுதிகளில் 15 துறைகளைச் சாா்ந்த 46 சேவைகளும் வழங்கப்பட உள்ளன.

மேலும், இம்முகாமில் இடம்பெறாத துறை சாா்ந்த மனுக்களை பெற்று நடவடிக்கை மேற்கொள்ளவும், மகளிா் உரிமைத் தொகை திட்டத்தின் கீழ் மனுக்களை பெற்றிடவும் தனியாக அலுவலா்கள் நியமிக்கப்பட்டுள்ளனா்.

குறிப்பாக வங்கிக் கடன் மற்றும் கல்விக் கடன் உள்ளிட்ட கோரிக்கை குறித்த மனுக்களும் பெறப்பட்டு சம்மந்தப்பட்டத் துறை அலுவலா்களுக்கு வழங்கி தீா்வு காண நடவடிக்கை மேற்கொள்ளப்பட்டு வருகின்றன. இம்முகாம்களை பொதுமக்கள் பயன்படுத்தி கொண்டு பயன்பெற வேண்டுமென தெரிவித்தாா்.

முகாமில் வாரிசு சான்றிதழ், மின் இணைப்பு பெயா் மாற்றம், பட்டா மாறுதல், தொழிலாளா் நல வாரிய அட்டை உள்ளிட்ட பல்வேறு கோரிக்கை மனுக்கள் அளித்த 9 பேருக்கு உடனடித் தீா்வாக சான்றிதழ்கள் மற்றும் ஆணைகளையும், வேளாண்மை மற்றும் உழவா் நலத் துறை சாா்பில் 5 பேருக்கு பயிறு வகைகள் விதைத் தொகுப்பு, காய்கறி விதைத் தொகுப்பு, நுண்ணூட்டம் விநியோகம், திரவ உயிா் உரங்கள் மற்றும் மாநில தோட்டக் கலை அபிவிருத்தி திட்டத்தின் கீழ் தென்னங்கன்று உள்ளிட்ட அரசு நலத் திட்டங்களை அமைச்சா் வழங்கினாா். தொடா்ந்து, அரசுத் துறைகளின் சாா்பில் அமைக்கப்பட்டிருந்த கருத்துக் காட்சி அரங்குகளை பாா்வையிட்டாா்.

இதில், மாவட்ட ஊரக வளா்ச்சி முகமை திட்ட இயக்குநா் பிரியா, ஈரோடு வருவாய் கோட்டாட்சியா் சிந்துஜா, பெருந்துறை வட்டாட்சியா் ஜெகநாதன் உள்பட துறை அலுவலா்கள் கலந்து கொண்டனா்.