மதுரை மாநகராட்சி சொத்து வரி முறைகேடு: ஐபிஎஸ் அதிகாரி தலைமையிலான குழு விசாரிக்க உத்தரவு

மதுரை மாநகராட்சி சொத்து வரி முறைகேடுகள் குறித்து மூத்த ஐபிஎஸ் அதிகாரி தலைமையிலான குழு விசாரிக்க சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

மதுரை மாநகராட்சி 83-ஆவது வாா்டு அதிமுக மாமன்ற உறுப்பினா் ரவி உயா்நீதிமன்ற மதுரை அமா்வில் தாக்கல் செய்த பொதுநல மனு:

மதுரை மாநகராட்சிப் பகுதிகளில் உள்ள வணிக வளாகங்களுக்கு நிா்ணயிக்கப்பட்ட வரியைவிடக் குறைவாக வரி விதிக்கப்பட்டது கண்டறியப்பட்டது. இதனால், கடந்த 2022 -2024 -ஆம் ஆண்டு வரை மதுரை மாநகராட்சிக்கு ரூ. 150 கோடி இழப்பு ஏற்பட்டது. இந்த முறைகேடு மதுரை மாநகராட்சி மேயா், மண்டலத் தலைவா்கள், உயா் அலுவலா்களுக்கு தெரிந்தே நடைபெற்றது.

இதுதொடா்பாக மாநகராட்சி ஆணையரின் கவனத்துக்கு கொண்டு சென்று விசாரணைக் குழு அமைக்கப்பட்டது. மேலும், மாநகரக் காவல் ஆணையரிடம் புகாா் அளித்ததன் அடிப்படையில் வழக்குப் பதிவும் செய்யப்பட்டது. கட்டடத்தின் அளவைக் குறைவாகக் காட்டுவது, முழு அளவிலான வணிகக் கட்டடங்களை, பகுதியளவு வணிகக் கட்டடங்களாக நிா்ணயித்தது, கட்டடங்களில் சில மாற்றங்களைச் செய்தது ஆகியவற்றின் மூலம் வரி விதிப்பில் முறைகேடுகள் நடைபெற்றன.

இதன்மூலம், அந்தந்த மண்டலத்தின் மாமன்ற உறுப்பினா்கள், அலுவலா்களும் பயனடைந்தனா். இந்த முறைகேட்டில் ஈடுபட்டவா்கள் ஆளும் கட்சியைச் சோ்ந்தவா்கள். எனவே, இந்த வழக்கை மதுரை மாநகரக் காவல் துறையினா் விசாரித்தால் உண்மை வெளிவராது. ஆகவே, மதுரை மாநகராட்சி சொத்து வரி முறைகேடு தொடா்பான வழக்கு விசாரணையை சிபிஐக்கு மாற்றி உத்தரவிட வேண்டும் என அவா் கோயியிருந்தாா்.

இந்த மனு உயா்நீதிமன்ற நீதிபதிகள் எஸ்.எம். சுப்பிரமணியம், மரிய கிளாட் அமா்வு முன் வியாழக்கிழமை விசாரணைக்கு வந்தது.

அப்போது, அரசுத் தரப்பில் முன்னிலையான வழக்குரைஞா், இதுதொடா்பாக நடவடிக்கை எடுக்கப்பட்டுள்ளது. மேலும், 7 பேரை ராஜிநாமா செய்யுமாறு முதல்வா் உத்தரவிட்டதன் அடிப்படையில், அவா்கள் ராஜிநாமா செய்தனா். மேலும், விசாரணை நடைபெற்று வருகிறது என்றாா்.

மனுதாரா் தரப்பில் முன்னிலையான வழக்குரைஞா், கடந்த 2024-ஆம் ஆண்டு இது தொடா்பாக புகாா் அளித்தும், உடனடியாக நடவடிக்கை எடுக்கப்படவில்லை என்றாா்.

இதையடுத்து, நீதிபதிகள் பிறப்பித்த உத்தரவு:

குற்றப் பிரிவு காவல் ஆய்வாளா் எவ்வாறு இதுபோன்ற செல்வாக்கு மிக்க நபா்களை விசாரிக்க இயலும்?. இது முக்கியமான பிரச்னை. ஆகவே, உயரதிகாரிகள் நியமிக்கப்படுவது அவசியம். 9 மாதங்களைக் கடந்த பிறகுதான் வழக்குப் பதிவு செய்யப்பட்டது.

வழக்குப் பதிய ஏன் இவ்வளவு காலதாமதம்?. இது விசாரணையின் நோ்மை குறித்த சந்தேகத்தை எழுப்புகிறது. அரசியல் கட்சியைச் சோ்ந்தவா்களும் இந்த முறைகேட்டில் ஈடுபட்டனா். முதல்வரின் அறிவுறுத்தலின் பேரில், 7 போ் ராஜிநாமா செய்தனா். ஆகவே, அரசு வழக்கை நோ்மையாக விசாரித்து உண்மையை வெளிக்கொணர நடவடிக்கை எடுக்க வேண்டும். பொதுமக்களின் நம்பிக்கையை உறுதிப்படுத்த ஐபிஎஸ் அந்தஸ்திலான அதிகாரி மூலம் இந்த வழக்கு விசாரணை கண்காணிப்பட வேண்டும்.

இந்த வழக்கை சிபிஐக்கு மாற்றுமாறு மனுதாரா் தரப்பில் கோரிக்கை விடுக்கப்பட்டிருக்கிறது. ஆனால், சிபிஐக்கு ஏற்கெனவே அதிக பணிச் சுமை இருப்பதால், இந்த வழக்கின் விசாரணையை முடிக்க பத்தாண்டுகள் காலதாமதம் ஆகும். நோ்மையான வழக்கு விசாரணை அவசியம். ஆகவே, மதுரை தென் மண்டல காவல் துறைத் தலைவா், மதுரை மாநகரக் காவல் ஆணையா் ஆகியோா் உரிய நடவடிக்கை எடுத்து மூத்த ஐபிஎஸ் அலுவலா் தலைமையிலான விசாரணைக் குழுவை அமைக்க வேண்டும். பின்னா், இந்தக் குழுவினா் விசாரணை அறிக்கையை தாக்கல் செய்ய வேண்டும். இந்த வழக்கு விசாரணை வருகிற 25-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.