சேலம் முள்ளுவாடி கேட் பகுதியில் பாலம் அமைக்க அதிகாரிகள் ஆய்வு

சேலம் முள்ளுவாடி கேட் பகுதியில் பாலம் அமைப்பது தொடா்பாக ரயில்வே கட்டுமான பிரிவு அதிகாரிகள் வியாழக்கிழமை ஆய்வுசெய்தனா்.

சேலம் மாநகரின் மேற்கு மற்றும் வடக்குப் பகுதிகளை இணைக்கும் முக்கியச் சாலையாக பிரெட்ஸ் சாலை உள்ளது. குறிப்பாக, ஆட்சியா் அலுவலகம், சேலம் அரசு மருத்துவமனை, பிரசித்தி பெற்ற கோயில்கள், பழைய பேருந்து நிலையம் ஆகிய நகரின் முக்கியப் பகுதிகளை இச்சாலை இணைக்கிறது.

இந்நிலையில், ரயில் வந்து செல்லும் நேரங்களில் முள்ளுவாடி ரயில்வே கேட் மூடப்படுவதால், பிரெட்ஸ் சாலையின் இருபுறங்களிலும் வாகனங்கள் நீண்ட வரிசையில் காத்திருக்கும் நிலை ஏற்படுகிறது. எனவே, முள்ளுவாடி பிரெட்ஸ் சாலையில், ரயில்வே மேம்பாலம் அமைக்க வேண்டும் என்ற கோரிக்கை எழுந்தது.

இதையடுத்து, பிரெட்ஸ் சாலையில் ஆட்சியா் அலுவலகத்தை அடுத்துள்ள கால்நடை இணை இயக்குநா் அலுவலகம் அருகே தொடங்கி, தொங்கும் பூங்கா வரை 600 மீட்டா் தொலைவுக்கு ரயில்வே மேம்பாலம் அமைக்க திட்டமிடப்பட்டு, ரூ. 21.16 கோடி நிதி ஒதுக்கப்பட்டது.

இதையடுத்து, தற்போது, மேம்பால கட்டுமானத்துக்கான ஆரம்பகட்ட பணிகள் வேகமாக நடைபெற்று வருகின்றன. இதற்கான ஆயத்தப் பணிகள் குறித்து ரயில்வே கட்டுமானப் பிரிவு அதிகாரிகள் வியாழக்கிழமை ஆய்வு நடத்தி, மேம்பால கட்டுமானத்துக்கான ஆரம்பகட்டப் பணிகள் நடைபெற்று வருவதால், விரைவில் மேம்பாலம் கட்டும் பணி தொடங்கப்பட உள்ளதாக தெரிவித்தனா்.