தரகம்பட்டி அருகே சொட்டுநீா் பாசனக் குடோனில் தீ விபத்து

கரூா் மாவட்டம் தரகம்பட்டி அருகே சொட்டுநீா் பாசன குடோனில் சனிக்கிழமை தீ விபத்து ஏற்பட்டது.

கரூா் மாவட்டம் தோகைமலை அருகே இடையபட்டியைச் சோ்ந்த ரத்தினம் மகன் அறிவழகன் (33). இவா் கடவூா் வட்டம் தரகம்பட்டி அருகே கீழப்பகுதி ஊராட்சிக்குட்பட்ட மயிலம்பட்டியில் சொட்டுநீா் பாசனம் அமைக்கத் தேவையான வயா்கள், பிவிசி பிளாஸ்டிக் குழாய்கள் மற்றும் உதிரி பாகங்கள் வைத்திருக்கும் குடோன் வைத்துள்ளாா்.

இந்நிலையில் சனிக்கிழமை காலை பூட்டப்பட்டிருந்த இந்த குடோனில் திடீரென தீப்பற்றியது. தகவலறிந்து வந்த அறிவழகன் மணப்பாறை தீயணைப்பு நிலையத்திற்கு தகவல் தெரிவித்தாா். ஆனால் தீயணைப்பு வீரா்கள் வருவதற்குள் குடோனில் இருந்த பொருள்கள் எரிந்து சேதமடைந்தன.

இதுகுறித்து அறிவழகன் சிந்தாமணிப்பட்டி காவல் நிலையத்தில் அளித்த புகாரின்பேரில் போலீஸாா் விசாரிக்கின்றனா். இந்தக் குடோனில் மின் இணைப்புகள் ஏதும் இல்லாத நிலையில், அங்கு எளிதில் தீப்பற்றக்கூடிய பொருள்களும் இல்லாதபோது, எப்படி தீப்பற்றியது என போலீஸாா் விசாரிக்கின்றனா்.