``தாராவியில் வீடு பெற தகுதியில்லாத 1 லட்சம் மக்களுக்கு...” - ஏக்நாத் ஷிண்டே சொல்வதென்ன?

மும்பை தாராவி, ஆசியாவிலேயே அதிக அளவில் குடிசைகள் உள்ள பகுதி. இக்குடிசைகளை அகற்றிவிட்டு அங்கு அடுக்குமாடி குடியிருப்புகள் கட்டும் திட்டம் 20 ஆண்டுகளாக நிலுவையில் இருந்து வருகிறது. தற்போது அத்திட்டம் தீவிரம் அடைந்திருக்கிறது. தாராவி குடிசை மேம்பாட்டுத்திட்டத்தை மாநில அரசு டெண்டர் விட்டு அதானி நிறுவனத்திற்கு வழங்கி இருக்கிறது. அதானி நிறுவனம் மாநில அரசுடன் இணைந்து கூட்டு நிறுவனம் ஒன்றை தொடங்கி தாராவியில் உள்ள குடிசைகளை இப்போது கணக்கெடுத்து வருகிறது.

மகாராஷ்டிரா சட்டமன்ற தேர்தலுக்கு முன்பே இக்கணக்கெடுப்பு தொடங்கி முழுவேகத்தில் நடந்து வருகிறது. இதில் யாருக்கு இலவச வீடு கிடைக்கும், யாருக்கு கிடைக்காது என்ற ஒரு கேள்வி மக்கள் மத்தியில் இருந்து கொண்டிருக்கிறது. அதோடு தாராவியில் உள்ள சிறுதொழில்களுக்கு எங்கு இடம் ஒதுக்கப்படும் என்ற கேள்வியும் எழுந்துள்ளது.

தாராவி குடிசைவாசிகளுக்காக ஏற்கனவே அதானி நிறுவனம் ரயில்வேயிடம் வாங்கிய நிலத்தில் அடுக்குமாடி குடியிருப்புகளை கட்ட ஆரம்பித்து இருக்கிறார்கள். தாராவியில் இருக்கும் குடிசைகள் பல அடுக்குகள் கொண்டதாக இருக்கிறது. குடிசைகளின் மேல் பகுதியில் உள்ள குடியிருப்புகளுக்கு மாற்று வீடு வழங்கப்படுமா என்ற கேள்வி குடிசைவாசிகள் மத்தியில் எழுந்துள்ளது.

இப்பிரச்னை குறித்து மாநில நகர்ப்புற மேம்பாட்டுத்துறை அமைச்சர் ஏக்நாத் ஷிண்டே, ''தாராவியில் வசிக்கும் மக்களுக்கு வீடுகள் வழங்கும் திட்டத்தை செயல்படுத்துவதற்கு இதற்கு முன்பு இருந்த விதிமுறைகள் தடையாக இருந்தது. அனைவருக்கும் வீடு வழங்க முந்தைய விதிகளில் இடமில்லை. தகுதியானவர்களுக்கு மட்டுமே வீடு வழங்கப்படும் என்று மகாவிகாஸ் அகாடி அரசு தெரிவித்தது. ஆனால் இப்போது தாராவி மக்கள் அனைவருக்கும் இலவச வீடு வழங்கப்படும்.

தாராவியில் வீடு பெற தகுதியில்லாத 1 லட்சம் மக்களுக்கு மும்பை புறநகர் பகுதியில் வீடுகள் கட்டிக்கொடுக்கப்படும். 2007ம் ஆண்டுக்கு முன்பு கட்டப்பட்ட குடிசைவாசிகளுக்கு தாராவியிலேயே வீடு வழங்கப்படும். 2007ம் ஆண்டுக்கு பிறகு மாநிலத்தில் வீட்டு வசதி மேம்பாட்டுக்கொள்கை உருவாக்கப்படவில்லை. ஆனால் இப்போது புதிய வீட்டு வசதி கொள்கை உருவாக்கப்பட்டு வருகிறது. மில் தொழிலாளர்களுக்கு ஒரு லட்சம் வீடுகள் கட்டப்படும்'' என்றார்.