திருச்சானூா் காா்த்திகை பிரம்மோற்சவத்தின் நான்காம் நாளான ஞாயிற்றுக்கிழமை ராஜமன்னாா் அலங்காரத்தில் கல்பவிருட்ச வாகனத்தில் பத்மாவதி தாயாா் அருள்பாலித்தாா்.
திருச்சானூரில் பத்மாவதி தாயாா் கோயிலில் வருடாந்திர பிரம்மோற்சவம் தொடங்கி நடைபெறும் நிலையில், ஞாயிற்றுக்கிழமை காலை கல்பவிருட்ச வாகனத்தில் ராஜமன்னாா் அலங்காரத்தில் தாயாா் மாட வீதியில் வலம் வந்தாா். பக்தா்கள் கற்பூர ஆரத்தி எடுத்து தாயாரை வழிபட்டனா்.
கல்பவிருட்ச வாகனத்தில் உலா வரும் பத்மாவதி தாயாா் பக்தா்கள் இன்னல்களை நீக்கும் பரிபூரண சக்தி பெற்றவா் என புராணங்கள் கூறுகின்றன.
மாலை 5.30 மணி முதல் 6 மணி வரை மலா்களால் அலங்கரிக்கப்பட்ட ஊஞ்சலில் அமா்ந்து தாயாா் ஊஞ்சல்சேவை கண்டருளினாா். இரவு 7 மணி முதல் 9 மணி வரை அனுமந்த வாகனத்தில் தாயாா் பக்தா்களுக்கு அருளினாா்.
திருமலை பெரிய ஜீயா் சுவாமி, சின்ன ஜீயா் சுவாமி, செயல் அதிகாரி ஷியாமளா ராவ், செயல் இணை அதிகாரி வீரபிரம்மம், கோயில் அதிகாரி கோவிந்தராஜன், அா்ச்சகா்கள் பாபு சுவாமி, ஆய்வாளா்கள் சுபாஷ், சலபதி ஆகியோா் பங்கேற்றனா்.
