திருச்சியிலிருந்து ஹைதராபாத், சென்னைக்கு கூடுதல் விமான சேவைகள் இயக்க திட்டம்! விமான நிலைய இயக்குநா் தகவல்!

திருச்சியிலிருந்து ஹைதராபாத், சென்னைக்கு விமான சேவைகளை இயக்க ஏா் இந்தியா எக்ஸ்பிரஸ் விமான நிறுவனம் முடிவு செய்துள்ளது என்றாா் நிலைய இயக்குநா் கோபாலகிருஷ்ணன்.

திருச்சி பன்னாட்டு விமான நிலையத்தில் நடைபெற்ற குடியரசு தின விழாவில் தேசியக்கொடியை ஏற்றி வைத்து, மத்திய தொழிலக பாதுகாப்பு படையினரின் அணிவகுப்பு மரியாதையை ஏற்றுக்கொண்டாா். தொடா்ந்து அவா் பேசுகையில், திருச்சி பன்னாட்டு விமான நிலைய முனையத்தை அடுத்து புதிய கட்டுப்பாட்டு கோபுரம் (ஏடிசி டவா்) மற்றும் தொடா்புடைய பணிகள் ரூ.60.75 கோடியில் நடந்து வருகின்றன. இவை மே 2025-க்குள் நிறைவடையும் என்று எதிா்பாா்க்கப்படுகிறது.

கடந்த 2024 ஆம் ஆண்டில் திருச்சி விமான நிலையத்தில் பயணிகள் போக்குவரத்து 15% வளா்ச்சியும், சரக்குப் போக்குவரத்து 13% வளா்ச்சியும் அடைந்துள்ளது. உள்நாட்டு விமான சேவையை மேம்படுத்தும் வகையில் ஏா் இந்தியா எக்ஸ்பிரஸ் நிறுவனம், கோடை காலத்தில் ஹைதராபாத், சென்னைக்கு தினசரி சேவைகளை இயக்கவுள்ளது. சரக்கு முனையமும் 24 மணிநேரமும் செயல்படும் வகையில் மேம்படுத்தப்படவுள்ளது என்றாா் அவா்.

நிகழ்வில் முனைய மேலாளா் சரவணன், அலுவலா்கள் சந்தானகிருஷ்ணன், சிவக்குமாா் மற்றும் மத்திய தொழிலகப் பாதுகாப்பு படையினா், விமான நிறுவன அலுவலா்கள், சுங்கத் துறையினா் உள்ளிட்டோா் பங்கேற்றனா். தொடா்ந்து, மாணவ, மாணவியரின் கலை நிகழ்ச்சிகள் நடைபெற்றன.