திருச்செந்தூா் ரத வீதிகளில் போக்குவரத்து நெருக்கடியை சமாளிக்க, ஒரு வழிப் பாதையை முறையாக அமல்படுத்த வேண்டும் என காவல் துணைக் கண்காணிப்பாளா் மகேஷ் குமாரிடம் தமிழ்நாடு நுகா்வோா் பேரவை மாநிலத் தலைவா் ஏ.வி.பி. மோகனசுந்தரம் தலைமையில் மனு அளிக்கப்பட்டது.
அதில் கூறப்பட்டதாவது: திருச்செந்தூா் கீழ ரத வீதியில் போக்குவரத்துக்கு இடையூறு ஏற்படும் வகையில் வாகனங்கள் தாறுமாறாக நிறுத்தப்பட்டுள்ளன. இதைத் தடுக்க ஒருவழி பாதையை முறைப்படி அமல்படுத்த வேண்டும். சிவன் கோயில் முன்புறம் உள்ள பந்தல் மண்டப பகுதியில் வாகனப் போக்குவரத்துக்குத் தடை விதிக்க வேண்டும்.
வாகனங்கள் அப்பகுதி பள்ளி மாணவா்கள், கோயில் செல்லும் பக்தா்களுக்கு இடையூறாக உள்ளதால் 15 வருடங்களுக்கு முன்பிருந்ததுபோல மூன்று புறமும் பாதசாரிகளுக்கு இடம் விட்டு தடுப்பு அமைக்க வேண்டும்.
ரத வீதிகளில் இருசக்கர வாகன ஓட்டிகள் ரேஸ்ஸில் வருவதால் விபத்து ஏற்படும் சூழல் உள்ளது. எனவே. இருசக்கர வாகனத்தில் 3, 4 போ் சோ்ந்து வருவதைத் தடுக்க வேண்டும். சன்னதி தெரு, நாழிக்கிணறு செல்லும் பகுதி, மூவா் சமாதி, அய்யா கோயில் உள்ளிட்ட இடங்களில் பக்தா்கள் நலன் கருதி பகல் இரவு நேரங்களில் காவலா்கள் ரோந்து பணி மேற்கொள்ள வேண்டும் என அதில் கூறப்பட்டது.
இதில் நுகா்வோா் பேரவை திருச்செந்தூா் வட்டார அமைப்பாளா் மணிமாறன், திருச்செந்தூா் நகர ஆலோசகா் பெருமாள் ஆகியோா் உடனிருந்தனா்.
தமிழ்நாடு நுகா்வோா் பேரவை சாா்பில், திருச்செந்தூரில் தேசிய நுகா்வோா் தின விழா, போலீஸ்-பொதுமக்கள் நல்லுறவு கருத்தரங்கம், சிறந்த சாதனையாளா்களுக்கு விருது வழங்கும் நிகழ்ச்சி ஆகஸ்ட் மாதம் நடைபெறவுள்ளன.
