தில்லி துவாரகா பகுதியில் மிரட்டி பணம் பறித்தல் சம்பவத்தில் ஈடுபட்டதாக குண்டரின் மனைவி மற்றும் சிறாா் உள்பட நான்கு பேரை தில்லி காவல்துறையினா் கைது செய்துள்ளதாக அதிகாரி ஒருவா் சனிக்கிழமை தெரிவித்தாா்.
இதுகுறித்து துவாரகா துணை காவல் ஆணையா் அங்கித் சிங் கூறியதாவது:
குற்றம் சாட்டப்பட்டவா்கள் விக்கி என்கிற விகாஸ், ரோகித் என்கிற ராக்கி, கிதிகா என்கிற கிது மற்றும் ஒரு மைனா் என அடையாளம் காணப்பட்டுள்ளனா். கிதிகா, காலா-ஜத்தேடி கும்பலைச் சோ்ந்த குண்டா் சச்சின் என்ற பாஞ்சாவின் மனைவி ஆவாா்.
முன்னதாக, மாா்ச் 10 ஆம் தேதி, நான்கு போ் ஜரோடா கலனில் உள்ள புகாா்தாரரின் வீட்டிற்கு காரில் வந்து சச்சின் சாா்பாக பணம் கேட்டு துப்பாக்கி முனையில் மிரட்டியதாகக் கூறப்படுகிறது.
பின்னா் புகாா்தாரருக்கும் அவா்களது வணிக கூட்டாளிகளுக்கும் பல மிரட்டல் அழைப்புகள் வந்தன. பகத் சிங் நகா் காவல் நிலையத்தில் இது தொடா்பான புகாரின் பேரில் வழக்கு பதிவு செய்யப்பட்டது.
விசாரணையின் போது சிசிடிவி காட்சிகள் பகுப்பாய்வும் தொழில்நுட்ப கண்காணிப்பும் குற்றவாளியை அடையாளம் காண உதவியது.
ஹரியாணாவின் ஜஜ்ஜாா் மாவட்டத்தில் உள்ள துல்ஹெடா கிராமத்தில் கிதிகா கண்டுபிடிக்கப்பட்டு கைது செய்யப்பட்டாா். அடுத்தடுத்த சோதனைகளில் விக்கி, ராக்கி மற்றும் மைனா் ஆகியோரின் கைது செய்யப்பட்டனா்.
சமீபத்தில் பரோலில் வெளிவந்த விக்கி, கிதிகாவுடன் திகாா் சிறையில் சச்சினை சந்தித்தது போலீஸ் விசாரணையில் தெரியவந்தது. மிரட்டி பணம் பெற்றுவந்த நிலையில், பணம் செலுத்துவதை நிறுத்திய உள்ளூா் சொத்து வியாபாரிகளை மிரட்டுமாறு சச்சின் அறிவுறுத்தியதாக கூறப்படுகிறது.
இத்திட்டத்தின் படி, விக்கி ஒரு காா் மற்றும் மூன்று கூட்டாளிகளை ஏற்பாடு செய்தாா். மேலும் அவா்கள் சமூக ஊடக தளத்தைப் பயன்படுத்தி பாதிக்கப்பட்டவா்களை அழைத்தனா்.
ரோத்தக் மற்றும் சோனிபட்டில் பதிவு செய்யப்பட்ட மூன்று கொலை வழக்குகள் உள்பட விக்கிக்கு ஒரு குற்றப் பின்னணி உள்ளது.
அதே நேரத்தில் ரோஹித் இரண்டு கொலை வழக்குகளில் சம்பந்தப்பட்டுள்ளாா். குற்றச்செயலுக்கு பயன்படுத்திய காா் மற்றும் 2 கைப்பேசிகளை போலீஸாா் மீட்டுள்ளனா். மேலும், விசாரணை நடந்து வருகிறது என்றாா் அந்த அதிகாரி.
