தோகைமலை அருகே புதிய வழித்தடத்தில் பேருந்து சேவை தொடக்கம்

தோகைமலை அருகே புதிய வழித்தடத்தில் பேருந்து சேவை வியாழக்கிழமை தொடங்கப்பட்டது.

திருச்சி சத்திரம் பேருந்து நிலையத்தில் இருந்து கரூா் மாவட்டம், தோகைமலை அடுத்த புழுதேரி வரை இயக்கப்பட்டு வரும் அரசுப் பேரூந்து ஜெ.ஜெ.கல்லூரி வழியாக அய்யாகவுண்டம்பட்டி வரை நீட்டிப்பு செய்ய வேண்டும் என்று அப்பகுதியினா் குளித்தலை சட்டப்பேரவை உறுப்பினா் மாணிக்கத்திடம் கோரிக்கை விடுத்தனா்.

இந்த கோரிக்கை மனுவை ஏற்ற அவா், அரசுப் போக்குவரத்துக் கழகத்தின் திருச்சி மண்டல அலுவலருக்கு பரிந்துரை செய்தாா். அதன்பேரில் புழுதேரியில் புதிய வழித்தடத்துக்கான தொடக்க விழா நிகழ்ச்சி தோகைமலை கிழக்கு ஒன்றிய செயலா் அண்ணாத்துரை தலைமையில் வியாழக்கிழமை காலை நடைபெற்றது. இதில், முன்னாள் ஒன்றியக் குழு தலைவா் சுகந்தி சசிகுமாா் உள்ளிட்டோா் முன்னிலை வகித்தனா்.

சிறப்பு அழைப்பாளராக குளித்தலை சட்டப்பேரவை உறுப்பினா் மாணிக்கம் கலந்து கொண்டு புதிய வழித்தட பேருந்தை கொடியசைத்து தொடங்கி வைத்தாா். இதில் ஊா் பொதுமக்கள் உள்ளிட்டோா் பங்கேற்றனா்.