தோரண வாயில் இடிந்து ஒருவா் உயிரிழப்பு: மாநகராட்சி அதிகாரி, ஒப்பந்ததாரா் மீது வழக்கு

மதுரை மாட்டுத்தாவணி பகுதியில் இருந்த நக்கீரா் தோரண வாயிலை இடித்த போது, ஏற்பட்ட விபத்தில் பொக்லை ஓட்டுநா் உயிரிழந்த தொடா்பாக மாநகராட்சி அதிகாரி, ஒப்பந்ததாரா் மீது 3 பிரிவுகளின் கீழ் கோ.புதூா் போலீஸாா் வழக்குப் பதிவு செய்தனா்.

மதுரை மாட்டுத்தாவணியில் சாலையின் நடுவே இருந்த நக்கீரா் தோரண வாயில் போக்குவரத்து இடையூறாக இருந்ததால், அதை அகற்ற சென்னை உயா்நீதிமன்ற மதுரைக் கிளை உத்தரவிட்டது. இதையடுத்து, மாநகராட்சி அதிகாரிகள் பொக்லைன் இயந்திரம் மூலம் தோரண வாயிலை அகற்றும் பணியில் புதன்கிழமை இரவு ஈடுபட்டனா். அப்போது, தோரண வாயில் இடிந்து, பொக்லைன் இயந்திரம் மீது விழுந்தது.

இதில் இடிபாடுகளில் சிக்கி பொக்லைன் இயந்திர ஓட்டுநரான மதுரை மாவட்டம், உலகாணி அருகே உள்ள பாரப்பட்டியைச் சோ்ந்த நாகலிங்கம் (23) சம்பவ இடத்திலேயே உயிரிழந்தாா். பலத்த காயமடைந்த ஒப்பந்ததாரா் நல்லதம்பி தனியாா் மருத்துவமனையில் அனுமதிக்கப்பட்டாா்.

இந்தச் சம்பவம் தொடா்பாக, பணியின் போது அலட்சியமாக இருந்ததாகக் கூறி மாநகராட்சி அதிகாரி, ஒப்பந்ததாரா் நல்லதம்பி ஆகிய இருவா் மீதும் கோ.புதூா் போலீஸாா் மூன்று பிரிவுகளில் வழக்குப் பதிவு செய்து விசாரணை நடத்தி வருகின்றனா்.