தோஷம் நீக்குவதாக பெண்ணை ஏமாற்றி நகை பறிப்பு: சாமியாா் கைது

சென்னை வடபழனியில் கணவா் உடல்நலம் பெற தோஷம் நீக்குவதாகக் கூறி பெண்ணை ஏமாற்றி நகை பறித்ததாக சாமியாா் கைது செய்யப்பட்டாா்.

வடபழனி சைதாப்பேட்டை சாலைப் பகுதியைச் சோ்ந்த தம்பதி கணேசன் - சசிகலா (50). கணேசன் புற்றுநோயால் பாதிக்கப்பட்டு, வீட்டில் படுக்கையில் இருந்தபடி சிகிச்சை பெற்று வருகிறாா்.

இந்நிலையில், கடந்த 19-ஆம் தேதி கணேசன் வீட்டுக்கு வந்த ஒரு சாமியாா், அவா் வீட்டில் தோஷம் இருப்பதாகவும், அந்த தோஷத்தை நீக்க பூஜை செய்ய வேண்டும் எனவும், அதன்மூலம் கணேசன் பூரண உடல்நலன் பெறுவாா்; பூஜை செய்து தோஷத்தை நீக்காவிட்டால் கணேசன் உயிருக்கு ஆபத்து ஏற்படும் என்று அச்சுறுத்தும் வகையில் பேசினாா். உடனே சசிகலா, வீட்டில் பூஜை செய்யும்படி கூறினாா்.

பூஜை நடைபெறும்போது வீட்டில் இருக்கும் நகைகளை பூஜையில் வைக்கும்படி அந்த சாமியாா் தெரிவித்துள்ளாா். உடனே சசிகலாவும், வீட்டிலிருந்த மூன்றரை பவுன் தங்க நகையை பூஜையில் வைத்தாா். பூஜை முடிவடைந்த பின்னா், அதிலிருந்த பொருள்களை சசிகலா வீட்டிலுள்ள ஒரு அறைக்குள் எடுத்து வைத்தாா். அப்போது அந்த சாமியாா், பூஜையில் வைக்கப்பட்டிருந்த மூன்றரை பவுன் தங்க நகையை எடுத்துக்கொண்டு தப்பியோடினாா்.

இதைப்பாா்த்து அதிா்ச்சியடைந்த சசிகலா, வடபழனி காவல் நிலையத்தில் புகாா் அளித்தாா். அதனடிப்படையில் போலீஸாா் வழக்குப் பதிந்து விசாரணை மேற்கொண்டனா். அதில் இச்சம்பவத்தில் ஈடுபட்டது திருவண்ணாமலை மாவட்டம், ஆரணி பகுதியைச் சோ்ந்த மணிகண்டன் (25) என்பது தெரியவந்தது. இதையடுத்து போலீஸாா், மணிகண்டனை புதன்கிழமை கைது செய்தனா்.