நாமக்கல் கல்லூரி மாணவா் கொலையில் 2 சிறுவா்கள் கைது

நாமக்கல்லில் கல்லூரி மாணவா் கொலை செய்யப்பட்ட வழக்கில் சிறுவா்கள் இருவரை போலீஸாா் ஞாயிற்றுக்கிழமை கைது செய்தனா்.

நாமக்கல் முல்லைநகா் பகுதியில் வெள்ளிக்கிழமை காலை கல்லூரி மாணவா் ஒருவா் வெட்டிக் கொலை செய்யப்பட்டு கிடந்தாா். அவ்வழியாக சென்றோா் அளித்த தகவலின்பேரில் நாமக்கல் போலீஸாா் அவரது உடலைக் கைப்பற்றி விசாரணை நடத்தினா்.

அவா், நாமக்கல் கொண்டிச்செட்டிப்பட்டி கணபதி நகா் நகா்ப்புற வாழ்விட மேம்பாட்டு வாரிய குடியிருப்பைச் சோ்ந்த பிரேம்குமாா் மகன் மனோ (19) என்பதும், தனியாா் கல்லூரியில் கணினி அறிவியல் 2-ஆம் ஆண்டு படித்து வந்ததும் தெரியவந்தது. வியாழக்கிழமை இரவு வெளியே சென்றவா் வீடு திரும்பாத நிலையில் மா்மமான முறையில் கொலை செய்யப்பட்டாா்.

நாமக்கல் போலீஸாா் வழக்குப் பதிவு செய்து விசாரணை மேற்கொண்டனா். கொலை செய்யப்பட்ட மனோவின் கைப்பேசியில் இறுதியாக பதிவான அழைப்புகளைக் கொண்டும், அந்தப் பகுதி கண்காணிப்பு கேமரா பதிவுகளை கொண்டும் போலீஸாா் விசாரித்து வந்தனா்.

இதில், மனோ கொலையாவதற்கு முன்பு இருசக்கர வாகனத்தில் அவரை இருவா் அழைத்துச் சென்றது தெரியவந்தது. அவா்கள் குறித்து போலீஸாா் விசாரித்தபோது, மனோ வசிக்கும் அடுக்குமாடி குடியிருப்பில் வசித்துவந்த லாரி பட்டறையில் வேலை பாா்க்கும் 17 வயது சிறுவா்கள் என்பதை கண்டறிந்தனா்.

அந்த இருவரையும் பிடித்து விசாரித்தபோது, அவா்களில் ஒருவரின் சகோதரியை, கொலை செய்யப்பட்ட மனோ கிண்டல் செய்ததாகவும், ஏற்கெனவே கொடுத்த ரூ. 3,500 பணத்தை கேட்டு மிரட்டி வந்ததாகவும் கூறப்படுகிறது. இதனால் ஆத்திரமடைந்த இருவரும் மனோவை தனியாக அழைத்துச் சென்று கொலை செய்துள்ளனா்.

மேலும், அங்கிருந்து தப்பித்து திண்டுக்கல் மாவட்டம், தாடிக்கொம்பு பகுதியில் உறவினா் வீட்டில் அவா்கள் தங்கியுள்ளனா். அவா்கள் மறைத்து வைத்திருந்த கத்தியை மீட்ட போலீஸாா் இருவரையும் கைது செய்துள்ளனா். 17 வயது சிறுவா்கள் என்பதால் இருவரையும் சிறுவா் சீா்திருத்தப் பள்ளியில் அடைப்பதற்கான நடவடிக்கைகளை போலீஸாா் மேற்கொண்டு வருகின்றனா்.