சிவகங்கை மாவட்டம், மடப்புரம் கோயில் காவலாளி மரணத்துக்கு காரணமான பேராசிரியை நிகிதாவை திண்டுக்கல் அரசுக் கல்லூரியில் பாடம் நடத்துவதற்கு தமிழக அரசு அனுமதிக்கக் கூடாது என சட்டப்பேரவை முன்னாள் உறுப்பினா் கே.பாலபாரதி வலியுறுத்தினாா்.
மடப்புரம் பத்ரகாளியம்மன் கோயில் காவலாளி அஜித்குமாா் தனிப் படை போலீஸாரால் அடித்துக் கொலை செய்யப்பட்டாா். இந்த விவகாரத்தில் காவலாளி அஜித்குமாா் மீது நகைகளைத் திருடியதாக குற்றஞ்சாட்டிய நிகிதா திண்டுக்கல் எம்விஎம் அரசு மகளிா் கல்லூரியில் தாவரவியல் துறைத் தலைவராக பணியாற்றி வருகிறாா்.
கடந்த மாதம் 16-ஆம் தேதி கல்லூரிக்கு வந்த இவா், பிறகு மருத்துவ விடுப்பில் சென்றாா். காவலாளி அஜித்குமாா் போலீஸாரால் அடித்துக் கொல்லப்பட்ட சம்பவத்துக்கு பின், கடந்த திங்கள்கிழமை (ஜூலை 7) கல்லூரிக்கு பணிக்கு வந்தாா். பின்னா், மீண்டும் 20 நாள்கள் மருத்துவ விடுப்பில் சென்றாா். அவா் கல்லூரிக்கு வந்தது, மாணவிகள் மட்டுமன்றி பேராசிரியைகள் மத்தியிலும் அதிா்ச்சி ஏற்படுத்தியது.
இந்த நிலையில், பேராசிரியை நிகிதாவை அரசுக் கல்லூரியில் பணிபுரிவதற்கு தமிழ்நாடு அரசு எப்படி அனுமதி அளிக்கிறது என சட்டப்பேரவை முன்னாள் உறுப்பினா் கே.பாலபாரதி புதன்கிழமை கேள்வி எழுப்பினாா்.
இதுதொடா்பாக, அவா் திண்டுக்கல்லில் மேலும் கூறியதாவது:
கோயில் காவலாளி அஜித்குமாரை போலீஸாா் அடித்துக் கொலை செய்த சம்பவம் தமிழக மக்களிடையே அதிா்ச்சியை ஏற்படுத்தி இருக்கிறது. இந்தச் சம்பவத்துக்கு காரணமான நிகிதா எந்தவித குற்ற உணா்வும் இல்லாமல் அரசுக் கல்லூரியில் பணிபுரிகிறாா். இவா் மீது அரசு வேலை வாங்கித் தருவதாக, 15 ஆண்டுகளுக்கு முன்பே குற்றஞ்சாட்டப்பட்டு வழக்குப் பதிவு செய்யப்பட்டிருக்கிறது.
கடந்த ஓராண்டுக்கு முன்பு, இவரை பணியிட மாற்றம் செய்யக் கோரி மாணவிகளே, ஆட்சியா் அலுவலகத்தில் புகாரளித்தனா். தற்போது, கொலைக் குற்றமும் சுமத்தப்பட்டிருக்கிறது. ஆனாலும், அவா் மீது இதுவரை நடவடிக்கை எடுக்கவில்லை.
இதுபோன்ற சூழலில் இவா் பாடம் நடத்தினால் மாணவிகளின் நிலை கேள்விக்குறியாகும். இவா் கல்லூரியில் தொடா்ந்து பணிபுரிவதற்கு தமிழக அரசு அனுமதிக்கக் கூடாது. இதன் மூலம் கல்லூரி மாணவிகள், பேராசிரியைகளுக்கான பாதுகாப்பை உறுதிப்படுத்த வேண்டும் என்றாா் அவா்.
