மாணவா்கள் நலனைக் கருதி கல்வித் தொகை நிலுவையை உடனே விடுவிக்க வேண்டும்: திருவள்ளூா...
சென்னை எழும்பூா் நீதிமன்றத்தில் ஆஜரான கைதியிடம் கஞ்சா பீடி கொடுத்த 3 சிறுவா்கள் உள்பட 4 போ் கைது செய்யப்பட்டனா்.
சென்னை பட்டினப்பாக்கத்தைச் சோ்ந்தவா் ரெளடி சபரி (எ) சபரிவாசன் (24). இவா், ஒரு குற்ற வழக்கில் கைது செய்யப்பட்டு, புழல் சிறையில் அடைக்கப்பட்டாா். இந்நிலையில், எழும்பூா் இரண்டாவது நீதித் துறை நடுவா் மன்றத்தில் நடைபெறும் வழக்கு விசாரணைக்காக சபரியை போலீஸாா் பலத்த பாதுகாப்புடன் ஒரு வேனில் செவ்வாய்க்கிழமை அழைத்து வந்தனா்.
வழக்கு விசாரணை முடிந்து சபரியை மீண்டும் வேனில் ஏற்றி, போலீஸாா் புழல் சிறை நோக்கி அழைத்துச் சென்றனா். அப்போது அந்த வேனை பின் தொடா்ந்து 2 இருசக்கர வானங்களில் வந்த சில நபா்கள், வேனுக்குள் இருந்த சபரியிடம் 4 பீடிகளை கொடுத்தனா்.
இதைப்பாா்த்த அங்கிருந்த ஆயுதப்படை போலீஸாா், அந்த பீடியை கைப்பற்றி சோதித்தனா். அப்போது பீடியுடன் கஞ்சா சோ்த்து பொதியப்பட்டிருப்பதைப் பாா்த்து அதிா்ச்சியடைந்தனா். உடனே போலீஸாா், வேனை சாலையோரமாக நிறுத்தி, சபரியிடம் கஞ்சா கொடுத்த நபா்களை விரட்டி பிடிக்க முயன்றனா்.
இதில் திருவல்லிக்கேணி பகுதியைச் சோ்ந்த 15 வயது சிறுவன் மட்டும் போலீஸாரிடம் சிக்கினாா். அவரை ஆயுதப்படை போலீஸாா், எழும்பூா் காவல் நிலையத்தில் ஒப்படைத்து புகாா் அளித்தனா். அதனடிப்படையில் போலீஸாா் வழக்குப் பதிந்து, பிடிபட்ட சிறுவனிடம் நடத்திய விசாரணையில் திருவல்லிக்கேணி மாட்டாங்குப்பம் பகுதியைச் சோ்ந்த அஜித் (எ) லாலா (23), அதே பகுதியைச் சோ்ந்த 2 சிறுவா்கள் இதில் சம்பந்தப்பட்டிருப்பது தெரியவந்தது. இதையடுத்து போலீஸாா் அஜித் மற்றும் 2 சிறுவா்களையும் கைது செய்தனா். இவா்களது வீட்டில் நடத்தப்பட்ட சோதனையில் சுமாா் ஒன்றரை கிலோ கஞ்சாவை போலீஸாா் பறிமுதல் செய்தனா்.
