பொறியியல் பராமரிப்புப் பணி: கோவை ரயில்கள் பகுதியாக ரத்து

கோவை போத்தனூா் ரயில் நிலையத்தில் பொறியியல் பராமரிப்புப் பணிகள் மேற்கொள்ளப்படுவதால் கோவை ரயில்கள் பகுதியாக ரத்து செய்யப்படுவதாக தெரிவிக்கப்பட்டுள்ளது.

இதுதொடா்பாக, சேலம் ரயில்வே கோட்ட நிா்வாகம் வெளியிட்டுள்ள செய்திக் குறிப்பு: பொறியியல் பராமரிப்புப் பணி காரணமாக ஜூன் 15, 16-ஆகிய தேதிகளில் கோவையில் இருந்து பிற்பகல் 2.30 மணிக்குப் புறப்பட வேண்டிய கோவை- மதுரை ரயில் (எண்: 16721) பிற்பகல் 2.45 மணிக்கு போத்தனூரில் இருந்து மதுரைக்கு புறப்பட்டு செல்லும். இதனால், கோவை- போத்தனூா் இடையே இந்த ரயில் இயக்கப்படாது.

கோவையில் இருந்து பிற்பகல் 1.50 மணிக்கு கண்ணூா் செல்லும் கோவை- கண்ணூா் ரயில் (எண்: 16608) போத்தனூரில் இருந்து பிற்பகல் 2.03 மணிக்கு கண்ணூா் புறப்பட்டு செல்லும். கோவை- போத்தனூா் இடையே இந்த ரயில் இயக்கப்படாது.

போத்தனூா்- மேட்டுப்பாளையம் மெமு ரயில் (எண்: 66616) மாலை 3.45 மணிக்கு கோவையில் இருந்து மேட்டுப்பாளையம் புறப்பட்டுச் செல்லும். இந்த ரயிலானது, போத்தனூா்- கோவை இடையே ரத்து செய்யப்படுகிறது.

கேரள மாநிலம் கண்ணூரில் இருந்து காலை 6 மணிக்குப் புறப்படும் கண்ணூா்- கோவை ரயில் (எண்: 16607), மதுரையில் இருந்து காலை 7.05 மணிக்குப் புறப்படும் மதுரை- கோவை ரயில் (எண்: 16722), ஜூன் 15, 16 ஆகிய தேதிகளில் போத்தனூா் வரை மட்டுமே இயக்கப்படும். போத்தனூா்- கோவை இடையே இந்த ரயில் இயக்கப்படாது.

மேட்டுப்பாளையத்தில் இருந்து பிற்பகல் 1.05 மணிக்குப் புறப்படும்

மேட்டுப்பாளையம்- போத்தனூா் மெமு ரயில் (எண்: 66615) ஜூன் 15, 16 ஆகிய தேதிகளில் மேட்டுப்பாளையம்- கோவை இடையே மட்டும் இயக்கப்படும். கோவை- போத்தனூா் இடையே ரத்து செய்யப்படுவதாக தெரிவிக்கப்பட்டுள்ளது.