நெல்லை ஆட்சியரக வளாகத்தில் தாறுமாறாக ஓடிய காா்: சேதம் தவிா்ப்பு

திருநெல்வேலி ஆட்சியா் அலுவலக வளாகத்தில் செவ்வாய்க்கிழமை காா் தாறுமாறாக ஓடிய நிலையில் உயிா்ச்சேதம் தவிா்க்கப்பட்டது.

திருநெல்வேலி ஆட்சியா் அலுவலகத்தில் செவ்வாய்க்கிழமை நடைபெற்ற தாமிரவருணி கூட்டுக்குடிநீா்த் திட்ட கலந்தாய்வுக் கூட்டத்தில் பங்கேற்ற சட்டப்பேரவைத் தலைவா் மு.அப்பாவு, செய்தியாளா்களுக்கு பேட்டியளித்துக் கொண்டிருந்தாா்.

அப்போது, ஆட்சியா் அலுவலக பிரதான வாயில் வழியாக வந்து கொண்டிருந்த காா் திடீரென கட்டுப்பாட்டை இழந்து அங்கு நிறுத்தப்பட்டிருந்த காா், மோட்டாா்சைக்கிள், மற்றோரு காா் ஆகியவற்றின் மீது மோதி நின்றது.

அங்கு பாதுகாப்புப் பணியில் ஈடுப்பட்டிருந்த போலீஸாரும், பத்திரிகையாளா்களும் காருக்குள் சிக்கிய நபரை மீட்டனா். விசாரணையில், அவா் தியாகராஜநகா் பகுதியைச் சோ்ந்த ஸ்டீபன் என்பதும், ரத்த அழுத்தத்திற்கு சிகிச்சை பெற்றுவந்த நிலையில் திடீரென உடல்நலக்குறைவு ஏற்பட்டதால் காா் கட்டுப்பாட்டை இழந்து விபத்தில் சிக்கியதும் தெரியவந்தது.

இச்சம்பவத்தில் பொதுமக்கள் யாருக்கும் எவ்வித பாதிப்பும் ஏற்படவில்லை. இதுகுறித்து திருநெல்வேலி மாநகர போக்குவரத்துப் புலனாய்வுப் பிரிவு போலீஸாா் விசாரித்து வருகின்றனா்.