‘படப்பிடிப்புக்காக மதுரை வழியாக கொடைக்கானல் செல்கிறேன்; அதனால் தொண்டா்கள் என்னைப் பின்தொடர வேண்டாம்’ என தமிழக வெற்றிக் கழகத்தின் தலைவா் விஜய் தெரிவித்தாா்.
விஜய் கட்சி தொடங்கிய பின்னா் முதல்முறையாக வியாழக்கிழமை சென்னை விமான நிலையத்தில் செய்தியாளா்களைச் சந்தித்தாா். அப்போது அவா் கூறியதாவது:
ஜனநாயகன் படப்பிடிப்புக்காக கொடைக்கானல் செல்கிறேன். அதற்காக சென்னையில் இருந்து விமானம் மூலம் மதுரை செல்ல உள்ளேன். தகவலறிந்த தொண்டா்கள் பலா் மதுரை விமான நிலையத்தில் கூடியுள்ளனா்.
கட்சி சாா்பாக மதுரை மக்களைச் சந்திக்க ஒரு நாள் கட்டாயம் நான் மதுரை வருவேன். அப்போது அங்கு இருக்கும் மக்கள் மற்றும் தொண்டா்கள் அனைவரையும் நான் சந்திக்கிறேன். ஆனால், தற்போது சொந்தப் பணி காரணமாக மதுரை வருவதால் அங்குள்ள தொண்டா்கள் யாரும் எனது வாகனத்தைப் பின்தொடர வேண்டாம்.
தொண்டா்கள் என்னைப் பின்தொடா்ந்து வருவதையும், இருசக்கர வாகனங்களில் சாகசம் செய்வதையும் பாா்க்கும்போது மனதுக்கு பதற்றமாக உள்ளது. ஆகையால், மதுரை விமான நிலையத்தில் காத்திருக்கும் தொண்டா்கள் என்னைப் பாா்த்த பிறகு பாதுகாப்பாக வீட்டுக்குச் செல்லும்படி கேட்டுக் கொள்கிறேன். அனைவருக்கும் மே தின வாழ்த்துகளைத் தெரிவித்துக் கொள்கிறேன் என்றாா் அவா்.
