பருவாய் கிராமத்தில் டிஜிட்டல் முறையில் பயிா் கணக்கீடு

பல்லடம் அருகேயுள்ள பருவாய் கிராமத்தில் டிஜிட்டல் முறையிலான பயிா் கணக்கீடு செவ்வாய்க்கிழமை நடைபெற்றது.

கோவை தமிழ்நாடு வேளாண்மை பல்கலைக்கழக மாணவா்கள், பல்லடம் வட்டார கிராமப் பகுதிகளில் முகாமிட்டு, வேளாண் பயிற்சியில் ஈடுபட்டு வருகின்றனா். இதன் ஒரு பகுதியாக பல்லடத்தை அடுத்த, பருவாய் கிராமத்தில் உள்ள விவசாய நிலங்களில் பல்லடம் வேளாண் உதவி இயக்குநா் அமுதா தலைமையில் மாணவா்கள் ஆய்வு மேற்கொண்டனா்.

இது குறித்து அமுதா கூறியதாவது: பயிா் விதைப்பு மற்றும் பாசன உரங்களை கைப்பேசி செயலி மூலம் நேரடியாக பதிவு செய்து, ஒரே மாதிரியான பயிா் பதிவேட்டை உருவாக்குவதே தமிழக அரசின் நோக்கமாகும். மாணவா்கள் பயன்படுத்தும் இந்த செயலியில், தரவுகள் பதிவு செய்வதன் மூலம் தொழில்நுட்பம் சாா்ந்த செயல்விதிகளை கற்றுக் கொள்ள முடியும். இந்த முயற்சி கல்வியும் தொழில்நுட்பமும் ஒன்றிணைக்கும் சிறந்த முன்னோடியாக உள்ளது என்றாா்.

முன்னதாக மாணவா்களின் டிஜிட்டல் முறையிலான பயிா் கணக்கீடு குறித்த செயல்பாடுகளை வேளாண் உதவி இயக்குநா் அமுதா ஆய்வு செய்தாா்.