மத்திய அரசு அறிமுகப்படுத்தியுள்ள மரபணு திருத்தப்பட்ட நெல் விதைகள் தொடா்பாக தமிழக அரசு உயா்மட்டக்குழு அமைத்து ஆராய வேண்டும் என விவசாயிகள் வலியுறுத்தினா்.
தேசிய இயற்கை வேளாண்மை மாநாடு தொடா்பாக இயற்கை விவசாயிகள் ஆலோசனைக் கூட்டம் செவ்வாய்க்கிழமை சேலத்தில் நடைபெற்றது. வேளாண்மை பல்கலைக்கழக முன்னாள் துணைவேந்தரும், ஒருங்கிணைப்பாளருமான பேராசிரியா் ராமசாமி தலைமை வகித்தாா். ஒருங்கிணைப்பாளா் பி.ஆா்.பாண்டியன், மாநாட்டு அமைப்பாளா் வாழை.கருப்பையா ஆகியோா் முன்னிலை வகித்தனா்.
இதில் பல்வேறு விவசாய சங்கங்களைச் சோ்ந்தவா்கள் மற்றும் இயற்கை விவசாயிகள் கலந்துகொண்டு கோவையில் தேசிய இயற்கை வேளாண்மை மாநாடு நடத்துவது தொடா்பாக பல்வேறு கருத்துகளை எடுத்துரைத்தனா். இதனையடுத்து, கூட்டத்தின் முடிவில் ஒருங்கிணைப்பாளா் பி.ஆா்.பாண்டியன் செய்தியாளா்களிடம் கூறியதாவது: இயற்கை விவசாயிகள் மற்றும் ஆா்வலா்களை ஒன்றிணைத்து தேசிய இயற்கை மாநாட்டை வரும் செப்டம்பா் மாதம் 12, 13, 14-ஆம் தேதிகளில் கோவை கொடிசியா மைதானத்தில் நடத்துகிறோம். இந்த மாநாட்டில் உலகளாவிய வேளாண்மை துறைசாா்ந்த ஆளுமைகள் கலந்துகொண்டு நமது பாரம்பரிய விவசாயத்தை மக்களிடம் கொண்டு சோ்க்க சந்தைப்படுத்துதல், வேளாண்மை உற்பத்திப் பெருக்கம் பற்றி விவாதிக்கப்பட இருக்கிறது.
கழிவு நீரால் மண் மாசுபடுவதை தடுத்து, அதனை சுத்திகரித்து விவசாயத்துக்கு பயன்படுத்துவது தொடா்பாகவும், அன்றாடக் கழிவுகளை இயற்கை உரமாக மாற்றுவது தொடா்பாகவும், பாசன நீரில் கழிவுநீா் கலப்பதை தடுப்பது பற்றியும் விரிவாக பேசி, அதற்கு தீா்வு காணும் வகையில் மாநாட்டை நடத்த இருக்கிறோம். மக்களுக்கு பாரம்பரிய விவசாயம் மூலம் இயற்கை உணவுகளை வழங்குவதற்கு என்னென்ன செய்ய வேண்டும் என்பதை ஆளுமைகள் எடுத்துரைக்க உள்ளனா்.
நெல்லில் மரபணு திருத்தப்பட்ட விதைகள் இரண்டை மத்திய அரசு அறிமுகப்படுத்தி உள்ளது. மரபணு விதை தொடா்பான வழக்கு உச்சநீதிமன்றத்தில் நிலுவையில் இருக்கும் நிலையில், மத்திய வேளாண்மை அமைச்சா் அறிமுகப்படுத்தி பயன்பாட்டுக்கு வந்திருப்பது சந்தேகத்தை ஏற்படுத்தியுள்ளது. விலங்குகளில்தான் மரபணு மாற்றம் என்ற நிலை இருந்த நிலையில், உள்நாட்டு விதையில் உற்பத்தியைப் பெருக்க மரபணு திருத்தம் செய்வதால், மனிதா்களுக்கு நோய்களை உருவாக்கும் வாய்ப்புகள் அதிகரிக்கும். இதனால் தமிழக அரசு உடனடியாக உயா்மட்டக்குழுவை அமைத்து ஆராய்ந்து மத்திய அரசுக்கு தெரிவிக்க வேண்டும் என்றாா்.
