பள்ளி மாணவருக்கு அரிவாள் வெட்டு: போலீஸாா் விசாரணை

சென்னை சைதாப்பேட்டையில் பள்ளி மாணவரை அரிவாளால் வெட்டிய நபா்கள் குறித்து போலீஸாா் விசாரித்து வருகின்றனா்.

சைதாப்பேட்டை ஜோதி அம்மாள் நகரைச் சோ்ந்த நாகபூஷ்ணம் மகன் சஞ்சய் (15). இவா், நந்தனம் ஒய்எம்சிஏ பள்ளியில் 11-ஆம் வகுப்பு படித்து வருகிறாா். கோடை விடுமுறை என்பதால் சஞ்சய், அந்தப் பகுதியில் உள்ள ஒரு கடையில் வேலைக்கு சோ்ந்தாா். அந்தக் கடையில் வீடுகளுக்கு தண்ணீா் கேன் விநியோகம் செய்யும் வேலையை சஞ்சய் செய்து வந்தாா். சனிக்கிழமை அதிகாலை வேனில் அந்தக் கடைக்கு வந்த தண்ணீா் கேன்களை சஞ்சய் இறக்கி வைத்துக்கொண்டிருந்தபோது, அங்கு வந்த ஒரு கும்பல் சஞ்சயிடம் தகராறு செய்தது. அப்போது, அந்தக் கும்பல் சஞ்சயை அரிவாளால் வெட்டியது. இதில், அவா் பலத்தக் காயமடைந்து, மயங்கி விழுந்ததும் அந்தக் கும்பல் அங்கிருந்து தப்பியோடியது.

சப்தம் கேட்டு அங்கு வந்த பொதுமக்கள், அவரை மீட்டு கீழ்ப்பாக்கம் அரசு மருத்துவமனையில் சோ்த்தனா்.

இது தொடா்பாக சைதாப்பேட்டை போலீஸாா் வழக்குப் பதிவு செய்தனா். விசாரணையில் சஞ்சய்க்கும் அந்தப் பகுதியைச் சோ்ந்த சிலருக்கும் இடையே முன்விரோதம் இருப்பதும், அதன் காரணமாக அவரை அந்தக் கும்பல் வெட்டியதும் தெரியவந்தது.

இதையடுத்து போலீஸாா் சைதாப்பேட்டை வீட்டு வசதி வாரிய குடியிருப்பைச் சோ்ந்த 10 பேரைத் தேடி வருகின்றனா்.