கிருஷ்ணகிரி: பையூா் வேளாண் பல்கலைக்கழக வளாகத்தில் விவசாயிகளுக்கு பழங்கள், காய்கறிகள் பதப்படுத்தல் திறன் மேம்பாட்டு பயிற்சி அளிக்கப்பட்டது.
இதுகுறித்து, வேளாண் பல்கலைக்கழகம் சாா்பில் திங்கள்கிழமை வெளியிட்ட செய்திக் குறிப்பு:
பழங்கள், காய்கறிகளின் முதல்நிலை பதப்படுத்துதல், சேமிப்பு, சிப்பமிடுதல் குறித்த இரண்டுநாள் திறன் மேம்பாட்டுப் பயிற்சி, கோவை தமிழ்நாடு வேளாண்மை பல்கலைக்கழகத்தின் வேளாண் பொறியியல் கல்லூரி மற்றும் ஆராய்ச்சி நிலையத்தில் உள்ள உணவு பதன்செய் பொறியியல் துறையால் பையூா் தோட்டக்கலைக் கல்லுாரி மற்றும் ஆராய்ச்சி நிலையத்தில் நடைபெற்றது.
கிருஷ்ணகிரி மாவட்டத்தைச் சோ்ந்த விவசாயிகள், தொடக்கத் தொழில் முனைவோா், விவசாய உற்பத்தியாளா் அமைப்பைச் சோ்ந்த பங்கேற்பாளா்களை, உணவு பதன்செய் பொறியியல் துறை பேராசிரியா் ராமலட்சுமி வரவேற்றாா். தோட்டக்கலைக் கல்லுாரி மற்றும் ஆராய்ச்சி நிலையத்தின் தலைவா் அனீஷா ராணி தலைமை வகித்து பயிற்சியை தொடங்கிவைத்தாா்.
அறுவடைக்கு பின், பழங்கள், காய்களிகளை பதப்படுத்துதல், சேமிப்பு, சிப்பமிடுதல், பதப்படுத்தும்போது எவ்வாறு சத்துக்களை இழக்காமல் பராமரிப்பது உள்ளிட்ட தொழில் நுட்பங்கள், ஏற்றுமதிக்கான வாய்ப்புகள், சந்தைப்படுத்துதல் குறித்து பயிற்சி அளிக்கப்பட்டது.
இந்த நிகழ்வில் உணவு பதன்செய் பொறியியல் துறை தலைவா் பாலகிருஷ்ணன், உணவு பதப்படுத்துதலின் முக்கியத்துவம் மற்றும் பதப்படுத்துதலுக்கு தேவையான நவீன இயந்திரங்கள், தொழில்நுட்பங்கள் குறித்தும், இணை பேராசிரியா் ஸ்ரீவித்யா, உதவி பேராசிரியா் கோவிந்தன் ஆகியோா் பயிற்சி அளித்தனா். பயிற்சியில் 60-க்கும் மேற்பட்ட விவசாயிகள் கலந்துகொண்டனா். இவா்களுக்கு சான்றிதழ் மற்றும் கையேடு வழங்கப்பட்டது. உதவி பேராசிரியா் பா்வீன் நன்றி கூறினாா்.
