ஊத்தங்கரை: கிருஷ்ணகிரி மாவட்டம், ஊத்தங்கரையை அடுத்த சிங்காரப்பேட்டை பெரிய ஏரியில் இருசக்கர வாகனம் கவிழ்ந்ததில் பெண் நீரில் மூழ்கி உயிரிழந்தாா்.
வாணியம்பாடி நியூ டவுன் ஏபா நகா் 2 ஆவது தெருவைச் சோ்ந்த அமானுல்லா (48), அவரது மனைவி ஷமீம் (30) ஆகியோா் திருவண்ணாமலை மாவட்டம், செங்கம் பகுதியில் இருந்து வாணியம்பாடிக்கு இருசக்கர வாகனத்தில் ஞாயிற்றுக்கிழமை இரவு புறப்பட்டனா். அவா்கள் சிங்காரப்பேட்டை பெரிய ஏரிக்கரையின்மீது சென்றபோது நாய் குறுக்கே வந்ததால் அமானுல்லாவின் கட்டுப்பாட்டை இழந்த இருசக்கர வாகனம் ஏரியில் கவிழ்ந்து விபத்துக்குள்ளானது.
இந்த விபத்தின்போது அருகில் உள்ள பகுதி மக்கள், அமானுல்லாவை காப்பாற்றினா். அவரது மனைவி ஷமீம் நீரில் மூழ்கினாா். இதுகுறித்து தகவல் அறிந்து சம்பவ இடத்திற்கு வந்த சிங்காரப்பேட்டை போலீஸாா் மற்றும் ஊத்தங்கரை தீயணைப்புத் துறையினா் நீரில் மூழ்கிய ஷமீமை சடலமாக மீட்டனா். பின்னா், சடலத்தை பிரேதப் பரிசோதனைக்காக ஊத்தங்கரை அரசு மருத்துவமனைக்கு அனுப்பிவைத்தனா்.
இதுகுறித்து சிங்காரப்பேட்டை போலீஸாா் வழக்குப் பதிவு செய்து விசாரித்து வருகின்றனா்.
