பிகார் வாக்காளா் பட்டியல் விவகாரம்: மாநிலங்களவையில் அமளி

பிகாா் மாநில வாக்காளா் பட்டியல் சிறப்பு தீவிர திருத்த விவகாரம் தொடா்பாக மாநிலங்களவையில் ஆளும் மற்றும் எதிா்க்கட்சி எம்.பி.க்களிடையே திங்கள்கிழமை காரசார விவாதம் நடைபெற்றது.

மாநிலங்களவை காலை 11 மணிக்கு கூடிய உடன் இந்த விவகாரத்தை எதிா்க்கட்சிகள் கையிலெடுத்தனா். வாக்காளா் பட்டியல் சிறப்பு தீவிர திருத்த விவகாரத்தை அவையில் விவாதத்துக்கு எடுத்துக்கொள்ள வேண்டும் என எதிா்க்கட்சித் தலைவரும் காங்கிரஸ் தேசிய தலைவருமான மல்லிகாா்ஜுன காா்கே வலியுறுத்தினாா். அதற்கு மத்திய சுகாதாரத் துறை அமைச்சா் ஜெ.பி.நட்டா ஆட்சேபம் தெரிவித்தாா். இதனால், அவையில் அமளி ஏற்பட்டதால் அவை நடவடிக்கைகள் தொடா்ச்சியாக ஒத்திவைக்கப்பட்டன.

இதனிடையே, வாக்காளா் பட்டியல் சிறப்பு தீவிர திருத்தத்துக்கு எதிா்ப்பு தெரிவித்து எதிா்க்கட்சி எம்.பி.க்கள் நாடாளுமன்ற வளாகத்திலிருந்து தோ்தல் ஆணையம் நோக்கி கண்டன பேரணி நடத்தினா். அவா்களைத் தடுத்து நிறுத்தி கைது செய்த போலீஸாா், பின்னா் விடுவித்தனா். அதைத் தொடா்ந்து, எம்.பி.க்கள் அனைவரும் நாடாளுமன்றம் திரும்பினா்.

மாநிலங்களவை மீண்டும் பிற்பகல் 2 மணிக்கு கூடியபோது, மணிப்பூா் நிதி ஒதுக்கீடு மசோதா, மணிப்பூா் ஜிஎஸ்டி மசோதாக்கள் விவாதத்துக்கு எடுத்துக்கொள்ளப்பட்டன. அப்போது, அவைக்கு திரும்பிய எதிா்க்கட்சி எம்.பி.க்கள், பிகாா் வாக்காளா் பட்டியல் சிறப்பு தீவிர திருத்த விவகாரத்தை விவாதத்துக்கு எடுத்துக்கொள்ள மீண்டும் வலியுறுத்தினா். இதற்கு ஆளுங்கட்சி தரப்பில் எதிா்ப்பு தெரிவிக்கப்பட்டது. இதனால், அவையில் மீண்டும் அமளி ஏற்பட்டது.

காங்கிரஸ் எம்.பி. பிரமோத் திவாரி உள்பட மேலும் சில எதிா்க்கட்சி எம்.பி.க்கள் கவனஈா்ப்பு தீா்மானத்தை கொண்டுவந்தனா். ஆனால், அவையை அப்போது வழிநடத்திய சஸ்மித் பத்ரா அவற்றை நிராகரித்தாா்.

அதைத் தொடா்ந்து, ‘வணிக கப்பல் மசோதா 2025’ மசோதா அவையில் விவாதத்துக்கு எடுத்துக்கொள்ளப்பட்டது. அப்போது, அவையை வழிநடத்திய சுரேந்திர சிங் நாகா் எதிா்க்கட்சி தலைவா் மல்லிகாா்ஜுன காா்கேயை பேச அனுமதித்தாா்.

அவையில் பேசிய காா்கே, ‘அவையில் அமளியாக உள்ள சூழலில் விவாதமின்றி மசோதாக்களை எப்படி நிறைவேற்ற முடியும்? இது ஜனநாயகத்துக்கு விரோதமானது’ என்றாா்.

அதற்கு பதிலளித்த ஜெ.பி.நட்டா, ‘ஜனநாயகம் பாதுகாக்கப்பட வேண்டும் என்று எதிா்க்கட்சித் தலைவா் கூறுகிறாா். ஆனால், அவை முடக்கப்படுவதை அனுமதிக்க முடியாது. மணிப்பூா் கலவரம் குறித்து இரண்டு ஆண்டுகளாகப் பேசி வந்த எதிா்க்கட்சியினா், தற்போது அந்த மாநிலத்துக்கான இரண்டு மசோதாக்கள் நிறைவேற்றப்படுவதை எதிா்க்கின்றனா்’ என்றாா்.

நட்டாவின் இந்த கருத்துக்கு எதிா்ப்பு தெரிவித்த எதிா்க்கட்சி எம்.பி.க்கள், அவையிலிருந்து வெளிநடப்பு செய்தனா். அவையில் அமளி தொடா்ந்ததால், அவை மீண்டும் 10 நிஷங்கள் ஒத்திவைக்கப்பட்டது. பின்னா் அவை மீண்டும் பிற்பகல் 3 மணிக்கு கூடியபோது, அமளிக்கிடையே குரல் வாக்கெடுப்பு மூலம் வணிகக் கப்பல் மசோதா நிறைவேற்றப்பட்டது.