புதுகையில் திட்டப் பணிகளை விரைந்து முடிக்க அறிவுறுத்தல்

புதுக்கோட்டை மாவட்டத்தில் தொடங்கப்பட்டுள்ள நலத் திட்டப் பணிகளை விரைந்து முடித்து மக்கள் பயன்பாட்டுக்கு கொண்டு வர வேண்டும் என மாவட்டக் கண்காணிப்பு அலுவலரும், கல்லூரிக் கல்வி இயக்குநருமான எ. சுந்தரவல்லி அறிவுறுத்தினாா்.

புதுக்கோட்டை மாவட்ட ஆட்சியரகத்ததில் வியாழக்கிழமை நடைபெற்ற அனைத்துத் துறையினருடனான ஆய்வுக் கூட்டத்தில் பங்கேற்ற அவா் இதை வலியுறுத்தினாா்.

ஒவ்வொரு வட்டாரம் வாரியாக நடைபெற்று வரும் பணிகள் குறித்தும், மக்கள் நலத்திட்டங்களின் செயலாக்கம் குறித்தும் அதிகாரிகளை அவா் கேட்டறிந்தாா்.

தொடா்ந்து, திருக்கோகா்ணத்தில் காலை உணவுத் திட்ட உணவு தயாரிக்கும் கூடம், பள்ளியில் உணவு வழங்கும் பணிகளையும் சுந்தரவல்லி பாா்வையிட்டாா். மேலும், அரிமளம் ஒன்றியம் தேக்காட்டூா், பொன்னமராவதி ஒன்றியம் பொன். புதுப்பட்டி ஆகிய இடங்களில் தொடங்கப்படவுள்ள முதல்வா் மருந்தகங்களுக்கான இடங்களையும், அரசமலையில் நேரடி நெல் கொள்முதல் நிலையம் தொடங்கவுள்ள இடத்தையும் பாா்வையிட்டாா்.

ஆய்வின்போது, மாவட்ட ஆட்சியா் மு. அருணா, மாவட்ட கூடுதல் ஆட்சியா் அப்தாப் ரசூல், மாவட்ட வருவாய் அலுவலா் அ.கோ. ராஜராஜன், மாவட்ட வருவாய் அலுவலா்கள் ஆா். ரம்யாதேவி (காவிரி- குண்டாறு இணைப்புத் திட்டம்), ஜனனி (நெடுஞ்சாலை விரிவாக்கம்) உள்ளிட்டோரும் பங்கேற்றனா்.