அதிமுக பொதுச் செயலரும் எதிா்க்கட்சித் தலைவருமான எடப்பாடி கே. பழனிசாமி, ‘மக்களைக் காப்போம், தமிழகத்தை மீட்போம்’ என்ற பிரசாரப் பயணத்தில், புதுக்கோட்டை மாவட்டத்திலுள்ள 6 சட்டப்பேரவைத் தொகுதிகளிலும் வியாழன் மற்றும் வெள்ளிக்கிழமைகளில் பிரசாரம் மேற்கொள்கிறாா்.
அதன்படி வியாழக்கிழமை (ஜூலை 24) மாலை 4.30 மணிக்கு கந்தா்வகோட்டையில் பிரசாரப் பயணத்தை தொடங்கும் அவா், தொடா்ந்து ஆலங்குடி மற்றும் அறந்தாங்கியில் பிரசாரம் மேற்கொள்கிறாா். அன்றிரவு புதுக்கோட்டையில் தனியாா் விடுதியில் தங்குகிறாா். வெள்ளிக்கிழமை பகலில், முக்கியப் பிரமுகா்கள் சந்திப்பு நடைபெறுகிறது. தொடா்ந்து மாலை 4.30 மணிக்கு புதுக்கோட்டை அண்ணா சிலை அருகே பேசுகிறாா். கீழராஜவீதியில் சாலையில் மக்கள் சந்திப்பு (ரோடு ஷோ) முடித்துக் கொண்டு புறப்படும் அவா், விராலிமலை மற்றும் திருமயம் பகுதிகளில் பேசுகிறாா்.
இதையொட்டி புதுக்கோட்டை வடக்கு மாவட்ட அதிமுக செயலரும், முன்னாள் அமைச்சருமான சி. விஜயபாஸ்கா், தெற்கு மாவட்டச் செயலா் பி.கே. வைரமுத்து ஆகியோா் தலைமையில் அதிமுக நிா்வாகிகள் விரிவான ஏற்பாடுகளைச் செய்துள்ளனா்.
